Aýyl sharýashylyǵy mınıstri S. Omarov, Soltústik Qazaqstan oblysynyń ákimi Q. Aqsaqalov, Qostanaı oblysynyń ákimi A. Muhambetov, Jambyl oblysynyń ákimi B. Saparbaev baıandama jasady.
"AО́K-tiń básekege qabilettiligi veterınarlyq jáne fıtosanıtarlyq qaýipsizdik jaǵdaıyna baılanysty", - dedi A. Mamın.
Memleket veterınarlyq jáne fıtosanıtarlyq jaǵdaıdy baqylaýdyń barlyq qajetti sharalaryn qabyldap jatyr. Janýarlar men qustardyń 23 asa qaýipti aýrýlaryna qarsy josparly profılaktıkalyq is-sharalar júrgizilýde. 2020 jyldyń 9 aıynda janýarlar men qustardyń asa qaýipti aýrýlaryna qarsy 122,2 mln vaksına nemese kórsetilgen kezeńge arnalǵan jospardyń 100,9% júrgizildi. Bul rette veterınarlyq preparattardyń shamamen 60%-y elimizde óndiriledi.
Qazaqstan birqatar qaýipti aýrýlar (jylqy men shoshqanyń afrıkalyq obasy, shoshqanyń klassıkalyq obasy) boıynsha qaýipsiz el retinde resmı halyqaralyq mártebege ıe. Osy jyldyń 9 aıynda ótken jyldyń sáıkes kezeńimen salystyrǵanda QR-da lısterıoz, anaerobty enterotoksemııa, rınopnevmonııa sekildi janýarlardyń asa qaýipti aýrýlarynyń sany azaıdy. 2020 jyly 3,8 mln ga alańda karantındik obektiler men aýyl sharýashylyǵy daqyldarynyń asa qaýipti zııandy organızmderine qarsy qorǵaý is-sharalary júrgizildi.
Ýaqytyly qabyldanǵan sharalar shegirtkelerdiń taralý arealyn 3,3 esege — 2018 jylǵy 1,7 mln gektardan osy jyly 515 myń gektarǵa deıin azaıtýǵa múmkindik berdi. Otandyq taýar óndirýshilerdi qoldaý maqsatynda osy jyldan bastap asa qaýipti zııandy organızmdermen, karantındik obektilermen jáne aramshóptermen kúresý úshin pestısıdterdiń barlyq túrlerin sýbsıdııalaý tetigi iske qosyldy.
Premer-Mınıstr veterınarlyq jáne fıtosanıtarlyq qyzmetti odan ári nyǵaıtý jónindegi sharalar keshenin ázirleý, veterınarııa jáne fıtosanıtarııa salasynda tekserýler, baqylaý jáne monıtorıng, sondaı-aq karantındik is-sharalar júrgizý jónindegi jumysty kúsheıtý qajettigin atap ótti.
Úkimet basshysy búgingi tańda qus tumaýyna qatysty jaǵdaı turaqtanǵanyn atap ótip, alaıda jaǵdaıǵa monıtorıng júrgizýdi jalǵastyryp, qajet bolǵan kezde aldyn alý sharalaryn jedel qabyldaý kerek ekenin aıtty. Premer-Mınıstr jergilikti atqarýshy organdardyń karantın men shekteý sharalaryn belgileý jáne alyp tastaý jónindegi sheshimderin ádilet organdarynda tirkeý rásimderin ońaılatýdy tapsyrdy. Aýyl sharýashylyǵy mınıstrligine múddeli memlekettik organdarmen birlesip, tıimdi baqylaýdy uıymdastyrý úshin veterınarlyq jáne fıtosanıtarııalyq qadaǵalaýdyń ulttyq júıelerin qurý tapsyryldy.
"Tıisti aqparattyq bazany jetildirý jáne prosesterdi avtomattandyrý arqyly aýyl sharýashylyǵy janýarlaryn 100% sáıkestendirýdi qamtamasyz etý qajet", - dedi A. Mamın.
Aýyl sharýashylyǵy jáne bilim mınıstrlikterine sala úshin kadrlar daıarlaýdy jetildirý jáne keıin aýylda jumys isteý shartymen veterınarııalyq jáne fıtosanıtarlyq qyzmet mamandyqtary boıynsha oqytýǵa bólinetin granttardy ulǵaıtý máselesin pysyqtaý tapsyryldy.
