Abaıdy izdegen qyz

– Alǵash Abaıdyń «Jelsiz túnde jaryq aı» ánin jattap alyp, otbasy qýanyshtarynda ata-anama, úıge kelgen qonaqtarǵa aıtyp berip júrdim. Ondaıda úlkender qyzyq kórip, kótermelep, qolpashtap, maqtaý-marapat­taryn aıamaıtyn. Ákem, tipti «Meniń qyzym qazaqtyń ataqty ánshisi bolady» dep qııa­lyma qanat bitiretin, – deıdi polısııa aǵa leıtenanty.

Kıra keıin Qostanaı qalasyndaǵy «Ozat» mektebinde oqıdy. Mektep qa­byrǵasynda júrip ustazdarynyń yq­­palymen Abaı lırıkasyn jattap, kórkemsóz saıystaryna qatysyp, júl­deli oryndardan kórinip júrdi. Mektepti támamdaǵan soń arman qýyp Almatyǵa baryp, joly bolyp ózi qalaǵan mamandyq boıynsha M.Esbolatov atyndaǵy Almaty akademııasyna oqýǵa túsedi. 2019 jyldan beri oblystyq polısııa depar­ta­mentiniń aqparattandyrý jáne baıla­nys basqarmasynda ınjener bolyp ju­mys isteıdi.

Qazir polıseı qyz oblystyq «Til­daryn» ortalyǵyndaǵy memlekettik tildi tereńdetip oqytý kýrsynda la­tyn álipbıin úırenip júr. Abaı óleńde­rimen sýsyndap ósken K.Gartman taıaýda «Memlekettik til –  táýelsizdik sımvoly» atty respýblıkalyq baıqaýǵa qaty­syp, júldeli ekinshi oryndy ıelendi. Máde­nıet jáne sport mı­nıstrliginiń uıym­dastyrýymen onlaın rejimde ótken til baı­qaýynda res­pýblıkanyń ár óńirinde mem­lekettik qyzmet salasynda eńbek etip júr­gen 20 shaqty ózge ult dıaspory synǵa túsipti.

– Bul baıqaýǵa qatysýǵa «Til-daryn» orta­lyǵyndaǵy ustazdarymnyń keńesi boıynsha ótinish berdim. Onlaın-kon­kýrs eki kezeńnen turdy. Birinshi týrda ózim týraly qysqasha beınebaıa­n ja­sadym. Onyń ishinde ózim, ata-anam, otbasym, týǵan jerim, bilim alǵan mektebim, jumys ornym týraly má­limetter qamtyldy. Odan keıin aýyrtpalyǵy mol polısııa qyzmetiniń ereksheligi men qyzmet barysynda ózimniń kúndelikti atqaratyn mindetim jaıly aýyzsha áńgimelep berdim. О́zim jatqa biletin Abaı óleńderin máner­lep oqydym. Ekinshi týr tikeleı efırde ótti. Bul kezeńde qazylar alqasy qoıǵan saýaldarǵa jaýap berip, elimizdiń táýelsizdik jyldaryndaǵy jetis­tikteri týraly baıan ettim. Konkýrsqa qatysqan áriptesterimniń osaly joq. Degenmen jolym bolyp, qazylar alqasynyń sheshimimen ekinshi orynǵa iliktim. Jalpy, meniń ómirlik jolymdy ashqan – Abaı Qunanbaıulynyń shyǵarmashylyǵy. Abaı óleńderi qarshadaı kezimnen rýhanı serigime aınaldy. Sodan beri men Abaıdy izdep kelemin. Uly aqynnyń qaı shyǵarmasyn oqysam da, avtordy kóz aldyma elestetip, dúnıege Abaı kózimen qarap kórýge tyrysamyn. Adam Abaıdy qaıtalap oqý arqyly ǵana ózin ózi jyǵa tanı túsedi. Sonyń nátıjesinde talaı belesti baǵyndyryp, bıik murattarǵa umtylyp kelemin, – dedi baıqaý júldegeri.

Kıra Gartman bıyl Abaıdyń 175 jyl­dy­ǵyna arnalǵan chellendjge qaty­syp, uly aqynnyń murasyn ózge ult ókilderine nasıhattaý sharalaryna da belsendi atsalysty.

Qostanaı oblysy