Osy oraıda, ıaǵnı koronavırýs indetiniń bolýy múmkin degen jańa tolqynyna daıyndyq barysynda Aqtaýda zamanaýı úlgidegi modýldi juqpaly aýrýlar aýrýhanasy ashyldy. Soltústik Kaspıı jobasynyń operatory «Nort Kaspıan Opereıtıng Kompanı N.V.» (NCOC) kompanııasy SKО́BTK Áleýmettik jáne ınfraqurylymdyq jobalar (ÁIJ) aıasynda ónerkásiptik modýldik turǵyn úı qurylysy tehnologııasynyń arqasynda qysqa merzimde salynyp, paıdalanýǵa berilgen aýrýhanalar ınfeksııa juqtyrǵan naýqastardy ýaqtyly anyqtap, oqshaýlaýǵa jáne durys em qabyldaýǵa múmkindik berip, aýrýdyń taralý qaýpin azaıtady.
Aqtaý qalasynyń 1-a shaǵyn aýdanynda ornalasqan keshen Mańǵystaý oblystyq aýrýhanasyna qarasty ınfeksııalyq stasıonar bolyp qyzmet atqarady. Mańǵystaý oblystyq densaýlyq saqtaý basqarmasy baspasóz qyzmeti bergen málimetke súıensek, aýmaǵy 4 gektar jerdi quraıtyn aýrýhana 200 tósektik orynǵa eseptelgen jáne qajetti medısınalyq jabdyqtarmen tolyqtaı qamtamasyz etilgen. Onyń ishinde 180 oryn stasıonarly bolsa, 20 oryn – jansaqtaý oryndary. Qurylys nysanynyń jalpy kólemi 8 064 sharshy metrdi quraıdy, onyń ishinde aýmaǵy 7 600 sharshy metr bolatyn keshen modýlderge bólingen, onyń árqaısysy túrli maqsattarǵa ıe. Mysaly, naýqastar bólmesi «E jáne F» blogynda ornalasqan bolsa, kórshi «B» blogynda – reanımasııalyq tósekter men operasııalyq zal, al «A» blogy – qabyldaý bólimshesi, «D» blogy – ınfeksııalyq bloktar jáne galereıa túrindegi dálizben baılanysqan bes palata bólimderi bar.
Ǵımarat ızolıasııa men otqa tózimdiligi joǵary deńgeıi MODEX temirbeton bloktarynan, sondaı-aq ramalyq sendvıch-panelderden qurastyrylǵan. Palatalar bokstalǵan, ár naýqastyń orny dınamıkalyq baqylaýmen, zamanaýı medısınalyq quraldarmen jabdyqtalǵan. Modýldyq aýrýhana ózara baılanysqan, juqpaly aýrýlar qaýipsizdigi qatań saqtalatyn bólimshelerden turady. Ár tósekke ottegi jetkizýdi qamtamasyz etetin ottekti-gazdandyrý stansasy bar. Bul erekshelikter ınfeksııanyń aldyn alý jáne juqtyrǵan adammen baılanysty boldyrmaý úshin jasalǵan. Medısına qyzmetkerleri men em alýshylardyń qaýipsizdigi tolyqtaı qamtamasyz etilgen jáne ottegi konsentratorymen jáne ortalyqtandyrylǵan ottegimen, medısınalyq gazben jabdyqtaý júıesi ornatylǵan. Keshende medısınalyq jáne káriz qaldyqtaryn zararsyzdandyrý ǵımaraty, kólikterdi zararsyzdandyrý beketi, ishki aýany tazartý-jeldetý, órt dabyly, beınebaqylaý júıesi de qarastyrylǵan. Búginde aýrýhana naýqastardy qabyldaýǵa daıyn. Onda 300-ge jýyq medısına qyzmetkeri jumys atqaratyn bolady, sondaı-aq qosymsha dárigerlik kadr rezervi jasaqtalǵan.
Joba «NCOC» kompanııasynyń demeýshiligimen salyndy. Iаǵnı óńirde koronavırýs ınfeksııasy qaýpiniń saqtalýyna baılanysty bul joba aıasynda Qazaqstan aýmaǵynda koronavırýs ınfeksııasynyń týyndaýyn jáne taralýyn boldyrmaý úshin 2020 jyldyń 18 tamyzy kúni konkýrstyq irikteý nátıjeleri boıynsha tańdalǵan «BI-Industrial» JShS merdigerimen kelisimshart jasalǵan. Jobany usynylǵan kúnge deıin aıaqtaý úshin kompanııa qurylystyń qyzǵan shaǵynda 1 myń adamǵa deıin jumysqa jumyldyrǵan. Al merdiger – qurylys salasynda úlken tájirıbesi bar qazaqstandyq BI Group kompanııasy. Mańǵystaý óńirinde áleýmettik turǵyda demeýshilik kórsetip, kóp kóńilinen shyǵyp júrgen NCOC kompanııasy áleýmettik jáne ınfraqurylymdyq jobalar baǵdarlamasy aıasynda Mańǵystaý oblysynda ózge de densaýlyq saqtaý nysandaryn tapsyrdy, sonyń ishinde Fort-Shevchenko qalasyndaǵy 25 oryndyq emhana men kúndizgi stasıonar, Túpqaraǵan aýdanyndaǵy ortalyq aýdandyq aýrýhananyń balalar bólimi men ózge de nysandar bar. Aqtaýdaǵy 100 kereýettik onkologııalyq ortalyqtyń qurylysy aıaqtalýǵa jaqyn.
Modýldi aýrýhana qurylysynyń aıaqtalýy saltanatty shara barysynda ınfeksııalyq aýrýhananyń qurylysyn júrgizýdegi belsendi eńbegi úshin «BL Industrial» JShS-nyń 11 qyzmetkeri oblys ákiminiń alǵys hatymen marapattaldy.
Sondaı-aq daıyndyq barysynda Mańǵystaý oblystyq jedel jáne shuǵyl medısınalyq járdem stansasy 20 jańa sanıtarlyq avtokólikpen tolyǵyp, óńirdiń jedel járdem qyzmetine «Hundai 350» markaly mamandandyrylǵan kólikterdiń kilti tabystaldy. Jańa qyzmettik kólikterdiń 13-i Aqtaý qalasyna, 5-i Munaıly aýdanyna jáne 2-i sanavıasııa qyzmetine attanady. Qazan aıynyń sońyna deıin taǵy «Jac Sunray» markaly 32 jedel járdem kóligi keledi jáne bul kólikterdiń barlyǵy lızıng arqyly satyp alynýda. Qarasha aıynda Mańǵystaýǵa taǵy 2 «ÝAZ Patriot» markaly reanımobıl avtokóligi kelmek. Osylaısha, óńirdiń jedel járdem avtoparki 100 paıyz kólikpen qamtamasyz etiledi. Qazirgi ýaqytta óńir boıynsha 47 jedel járdem brıgadasy jumys isteıdi.
Jańa stasıonar, jańa jedel járdem kólikteri alasapyranǵa emes, tynyshtyqqa qyzmet etse dep tileısiń.
Mańǵystaý oblysy
