Brazılııada bir kúnde 24,8 myń adamnan, Argentınada 18,3 myń adamnan aýrý tirkelip, Fransııada KVI juqtyrǵandar 1 mlnnan asty. Buǵan deıin Batys Eýropada mıllıonǵa jetken Ispanııa ǵana bolatyn.
Polsha Premer-mınıstri Mateýsh Moraveskıı eldiń úshinshi tipti tórtinshi tolqynǵa daıar bolýy kerektigi jaıynda aıtty, deıdi Polskie Radio 24. Polıak radıosynyń habarlaýyna qaraǵanda Moraveskıı úkimettik otyrysta 24 qazannan bastap búkil Polsha aýmaǵyn "qyzyl aımaq" dep jarııalaý qajettigine toqtalǵan kórinedi.
Úkimet eger vaksına jasalyp shyqsa ony alýǵa quny tólenip qoıǵan EO quramyndaǵy eldiń biri ekenin, vaksına daıar bola salysymen azamattardyń onymen tolyq qamtylatynyn jetkizgen Moraveskııdiń aıtýynsha eldegi COVID-19 taralýy alańdatarlyqtaı kúıde, anyqtalǵan aýrýlar sany sát saıyn ósý ústinde.
Osyǵan deıin el ishinde "qyzyl aımaq" dep jarııalanǵan aýdandarda dúkenderde 5 adamnan artyq kezekke turýǵa bolmaıtyn. Onyń ózinde qashyqtyq qatty qadaǵalanýy tıis. Halyq jınalatyn barlyq saltanatty sharalar ótkizýge ruqsat joq, al shirkeýdegi qulshylyqta adamdar arasy 7 metrden kem bolmaýy qajet.
22 qazan kúni polıak Seımi de pandemııaǵa qatysty zań jobasyn qaraıdy, onda eldegi birneshe saıası partııalardyń usynystary qarastyrylǵan. "Quqyq jáne ádilettilik" partııasy COVID-19-ǵa qarsy kúresip jatqan dárigerlerge eńbekaqyny 2 esege arttyrý, sonymen qatar ınfeksııamen kúres ýaqytynda jiberilgen dáriger tarapynan qasaqana jiberilmegen qatelikter úshin qylmystyq qudalanýdan bosatý jaıynda bap usynylǵan.
Irlandııa halqy Úkimettiń 19 qazanda qabyldaǵan sheshimimen qatań karantın sharalary aıasynda tirshilik etip jatyr
Shekteýge baılanysty endi ıralandyqtardyń tek et jaqynymen ǵana kezdesýine ruqsat etilgen. Barlyq saýda oryndary jabylyp, azyq-túlik dúkenderi men dárihanalar ǵana jumys isteıdi. Búkil qoǵamdyq tamaqtandyrý oryndarynyń klıentter qabyldaýyna bolmaıdy, olardyń tapsyrys boıynsha úılerge aparyp berip qana qyzmet kórsetýi talap etilgen.
Oǵan qosa ırlandyqtyń óz turǵylyqty jerinen 5 shaqyrymnan alysqa shyqpaýy, barlyq qyzmetkerlerdiń úılerinde otyryp jumysty qashyqtan ǵana oryndaýy karantın zańdylyqtaryna kirgizilgen kórinedi. Tártip buzǵandar 500 eýrodan 2500 eýroaǵa deıin aıyp tóleıdi.
Dagens Nyheter gazetiniń habarlaýyna qaraǵanda Shvesııa Densaýlyq saqtaý agenttigi 22 qazan kúni COVID-19-ǵa qatysty jańa tártipterdi jarııa etedi
Ázirge barlyq tártip asa qupııa túrde. Al pandemııa bastalǵaly Shvesııanyń karantın jarııalamaı, ujymdyq ımmýnıtet paıda bolýy tıis degen ustanymda bolyp, tek jasy ulǵaıyp, 70 ten asqan adamdardyń ózderin saqtap syrtqa shyqpaýyn usynǵany aıan. Biraq ekinshi tolqyndaǵy ekpin Shvesııa úkimetin oılandyryp tastady.
Memlekettik bas epıdemıolog Anders Tegnell shekteý tártibiniń qandaı deńgeıde bolatynyn jýrnalısterge aıtýdan bas tartqan. Ol tek jańa tártiptiń eski men jańanyń qosyndysy bolatynyna ǵana toqtaldy.
