"Qosymsha karantındik sharalar men shekteýlerdi engizý qalanyń qaı "aımaqta" ornalasqanyna baılanysty. Qazir elorda "jasyl aımaqta", biraq sońǵy kúnderi Covid-19 aýrýynyń ósimi baıqalady. Eger 19 qazanda 13 jaǵdaı tirkelse, 20 qazanda 29, al 21 qazanda 15 jaǵdaı tirkeldi. Dınamıka turaqsyz.
Birinshi. Qazir Sovid-19 indetiniń alǵashqy tolqyny kezindegideı aýrýdy ýshyqtyryp almaý asa mańyzdy. Ol kezde kovıd stasıonarlaryn birinen soń birin ashtyq, palatadaǵy tósek oryndar sanaýly saǵatta tolyp ketetin. Bosańsýǵa bolmaıdy, sebebi vırýs eshqaıda ketken joq, ol áli bar.
Dárigerler eger adam bir aýyryp tursa, bul onyń vırýsqa qarsy ımmýnıteti bar degen sóz emes deıdi. Eger naýqas koronavırýsty bir ret jeńse, bul onyń qaýipsizdikte ekenin bildirmeıdi. Ǵalymdar áli kúnge deıin koronavırýstyń qandaı zardaby bar ekenin anyqtap jatyr.
Ekinshi. Qazir biz keıbir kafe, meıramhana men basqa da nysandardyń karantındi buzyp, koronavırýstyń beıbereket taralýyna jaǵdaı jasap jatqanyn kórip otyrmyz. Osyǵan baılanysty biz reıdter ótkizýdi kúsheıttik.
Úshinshi. Bizdiń dárigerler tájirıbe jınady, medısınalyq mekemeler de daıyn, biraq ózińizge eksperıment jasaý ne kerek. Tósek oryndar qajet bolǵan jaǵdaıda, myńdaǵan oryndy daıyndaı alamyz, degenmen bárine bir ýaqytta dárigerler jetpeıdi. Jabdyqtalǵan stasıonarlar medısına qyzmetkerlerinsiz pasıentterdi emdeı almaıdy. Covid-19 indetimen baılanysty osyndaı qaýipti jaǵdaıda otpen oınaýǵa bolmaıdy, "men aýyrmaımyn" dep oılamańyz – ózińiz ben jaqyndaryńyzdy koronavırýstan saqtańyz. Eń álsiz top - egde jastaǵy adamdar, biz olardy qorǵaýymyz kerek.
Infeksııamen kúresý úshin biz medısınalyq mekemelerdi qajetti qural-jabdyqpen, dári-dármekpen, qorǵanysh zattarymen qamtamasyz ettik. Sońǵy aptalarda qosymsha 50-den astam ókpeni jasandy jeldetý apparatyn (buryn satyp alynǵandarmen birge О́JJ apparattarynyń sany 434-ti quraıdy), 2 kompıýterlik tomografııa apparatyn (qalada barlyǵy 19 KT), ókpeniń qansha prosentke zaqymdanǵanyn kórsetetin 7 sıfrlyq rentgenografııa júıesin satyp aldyq (Qalada barlyǵy 63 rengten). Buǵan deıin medısına mekemelerine ottegi konsentratorlary, floýmetrler men taǵy basqalar qoıyldy.
Jedel medısınalyq járdem stansııasynyń avtoparki eki ese - 64 mashınadan 130-ǵa deıin ulǵaıtyldy. Jedel járdem mashınalarynyń taǵy bir partııasyna qosymsha tapsyrys berdik. 1,5 myń medısına qyzmetkerinen rezerv qalyptastyryldy. Osy baǵyttaǵy jumystar jalǵasýda.
Tórtinshi. Biz Eýropa elderindegi iri qalalar karantındi kúsheıtip jatqanyn kórip otyrmyz. Biz birinshi tolqynnan sabaq alýymyz kerek! Jazda ár otbasy derlik koronavırýsqa qatysty jaǵdaıdy baqylap qana qoımady: tanystary, áriptesteri, dostary, týystary aýyrdy. Sanıtarııa normalaryn qatań saqtap qana indettiń órshýine jol bermeýge bolady.
Medısına qyzmetkerleri segiz aı boıy koronavırýspen kúreste aldyńǵy shepte júr. Bizdiń mindetimiz – dárigerlerge júktemeni odan ári kóbeıtpeý, jaqyndarymyz ben týystarymyzǵa juqtyrmaý, óıtkeni ǵylym naýqastardyń bolashaqta qandaı saldarǵa tap bolatynyn áli tolyq anyqtaǵan joq. О́zińizdi jáne jaqyndaryńyzdy qorǵańyz!", - dep jazdy Altaı Kólginov.
