О́ńirde oblystyq jáne aýdandyq dárejedegi joldardyń jalpy uzyndyǵy 5 082,7 shaqyrymdy quraıdy. Munyń 1 148 kılometri ǵana asfalt. 2 081 shaqyrym jolǵa qıyrshyq tas tóselgen bolsa, dala joldarynyń uzyndyǵy 1 853 shaqyrymǵa sozylyp jatyr.
– Memleket basshysy eldiń kóliktik-logıstıkalyq áleýetin odan ári arttyrýdy tapsyrdy. Osy baǵytta byltyr bólingen 27,3 mlrd teńge qarajatqa 368 shaqyrym jol jóndelgen edi. Bıylǵy kólem odan biraz joǵary. Biz jol salyp qana qoımaı, osy joldarda júrip jatqan jumystardyń sapasyna qoǵamdyq baqylaýdy kúsheıttik. Ol úshin oblystyq jolaýshylar kóligi men avtomobıl joldary basqarmasy men Oral qalasy, aýdandar ákimdikterimen birlesip oblys turǵyndary arasynan jol salasy boıynsha bilikti jáne tájirıbeli qoǵamdyq ókilderden toptar quryldy. Atalǵan top avtojoldardy jóndeý jumystarynyń sapasyn tekseredi, jóndeý aıaqtalǵan soń nysandy tapsyrý kezinde qoǵamdyq ókil nysandy qabyldaý jumystaryna qatysady, – degen edi óńir basshysy Ǵalı Esqalıev.
Batys Qazaqstan oblysynda bıyl qolǵa alynǵan 102 jobanyń ishinde uzyndyǵy 103,7 shaqyrymdyq respýblıkalyq mańyzy bar 9 joba bar. Buǵan 7,1 mlrd teńge bólingen. Sondaı-aq 12 mlrd teńgege 167,8 shaqyrym oblystyq jáne aýdandyq joldar jóndelip jatyr. Al eldi mekenderdiń ishindegi kóshe joldaryn salý úshin 69 jobaǵa 17,1 mlrd teńge qarastyrylǵan. Mundaı joldardyń jalpy uzyndyǵy 165 shaqyrymǵa sozylyp jatyr.
– Oblysta jol qurylysy úshin «Jumyspen qamtýdyń jol kartasy» baǵdarlamasy arqyly 10 mlrd teńge, «Aýyl – el besigi» baǵdarlamasy boıynsha 4,2 mlrd teńge bólindi. Qazir jalpy jolǵa bólingen qarjydan 23,4 mlrd teńge ıgerilip, 335 shaqyrym jol jóndeýden ótti, – deıdi oblys ákiminiń orynbasary Tımýrjan Shákimov.
«Jumyspen qamtýdyń jol kartasy» aıasynda júzege asyrylatyn 48 joba kezinde 10 mlrd teńgege 86,6 shaqyrym jol jóndeý josparlanǵan eken. Osy jumystarǵa jańadan 2 730 adam qyzmetke tartylǵan. Oblys ortalyǵynda 30 joba aıasynda 34,2 shaqyrym jol jóndelse, segiz aýdanda jalpy uzyndyǵy 52,4 shaqyrym jolǵa arnalǵan 18 joba júzege asyp jatyr. Oblys basshysy Ǵalı Esqalıev bıylǵa josparlanǵan jol jóndeý jumystaryn bir aı ishinde aıaqtaý jóninde tapsyrma berdi.
Sonymen qatar aldaǵy qys kezinde joldy kútip ustaýǵa daıyndyq isi de jaqynda ótken arnaıy jıynda pysyqtaldy. Oblys quzyryndaǵy joldardy qys ýaqytynda jaramdy etip ustaý birneshe mekemege júktelgen. Máselen, «Jolaýshy Jol» JShS Aqjaıyq, Jańaqala jáne Bókeı orda aýdandarynyń jolyn qadaǵalasa, «Asfa» JShS Báıterek aýdanyna jaýap beredi. «Dorremservıs» fırmasy Bórli, Syrym jáne Qaratóbe aýdany aýmaǵyndaǵy joldarda kedergi bolmaýyn óz moınyna alǵan. «Sham Shyn» JShS Terekti aýdany úshin jaýap berse, «Jaıyqstroıgrýpp» mekemesi Tasqala men Qaztalov aýdandaryndaǵy joldardy qadaǵalamaq. Syrym men Qaratóbe aýdandaryndaǵy keıbir jol bólikteri úshin jaýapkershilikti «Baqyt joldary» JShS, Terekti men Bórli aýdanynyń keı bóligin «Basov» jeke kásipkerligi alǵan. «Orda joldary» fırmasy da Terekti men Aqjaıyq aýdandary aýmaǵyndaǵy ózderine mindettelgen jol bólikterin qardan tazartyp, kedergisiz jol qatynasyn uıymdastyrýdy mindetine alǵan eken.
Joǵaryda atalǵan kásiporyndarda qar tazalaıtyn 94 tehnıka bar eken. Onyń 15-i – avtogreıder, 35-i – qajetti tirkeme jalǵanǵan T-150 jáne K-701 traktorlary. Ártúrli modıfıkasııadaǵy 15 tıegish pen jolǵa qum shashatyn 10 tehnıka da qar men muzda jolaýshylarǵa kómekke kelýge ázir kórinedi. Qajet kezinde qosymsha tehnıka tartý múmkindigi de qarastyrylǵan.
Kúre joldar boıynda jylytý beketteriniń sany – 10. Bul jerde tranzıttik kólikter aýa raıynyń qolaısyz kezinde ýaqytsha panalaıdy. Sondaı-aq boran kezinde qar basyp qalý qaýpi bar jol bólikterinde turaqty túrde kezekshilik uıymdastyrylyp, qar tazalaıtyn tehnıka saqadaı saı turady. Bul jol qyzmetkerleriniń jyl saıyn atqaryp júrgen jumysy.
Al aýdandyq deńgeıdegi joldardyń jaǵdaıyn 26 merdiger mekeme qadaǵalamaq. Olardyń quzyrynda 159 birlik tehnıka bar. Sonyń ishinde aýylaralyq joldardyń qar basý qaýpi bar 110 bóligi erekshe baqylaýda bolmaq. Mundaı joldardyń jalpy uzyndyǵy 280 shaqyrym shamasynda.
«Jolaýshylar qozǵalysy belsendi júretin jol bólikterin qardan tazartý 2-4 saǵat ishinde júrgiziledi. Al oblystyq mańyzy bar jol bólikterin tazartý jumysyn bir táýlikten keshiktirmeı atqaramyz» dep ýáde berip otyr tıisti mekemeler.
Jol boıynda apatty jaǵdaılar týyndamas úshin jyldamdyqty shekteý, kóktaıǵaqty eskertý sekildi jol belgileri aldyn ala ázirlengen.
«Oblystyq jáne aýdandyq baǵynystaǵy jol aýmaqtarynda kez kelgen apattyq jaǵdaılardyń aldyn alýǵa ázirmiz. Qosymsha jol tehnıkalaryna muqtajdyq joq» deıdi Tımýrjan Shákimov.
Batys Qazaqstan oblysy aýmaǵynan ótetin 1500 shaqyrymdaı jol respýblıkalyq mańyzy bar kúre jol sanalady. Bul joldarda qys kezinde kidirissiz qozǵalysty qamtamasyz etý – óte mańyzdy másele. Bul úshin 359,204 mln teńge qarjy bólingen. Bul aýmaqta jol qozǵalysynyń kedergisiz bolýyna negizinen «Qazaqavtojol» mekemesiniń oblystyq fılıaly jaýap beredi. Mekeme basshylary qajetti tehnıka tolyq daıyn ekendigin habarlap otyr. Al qajetti qosymsha materıal – qumnyń 50 paıyz mólsheri, tuzdyń 55 paıyz kólemi qazirdiń ózinde jetkizilgen.
Qysqasy, elimiz boıynsha asfalt joldary eń az Aqjaıyq óńirinde jol azabyn shegetinder qatary jyl saıyn azaıyp keledi. Degenmen oblys turǵyndary talaı jyldan kútken Oral – Jánibek – Bókeı orda jolynyń qurylysy baıaý júrip jatqanyna halyq alańdap otyr. Elbasynyń tikeleı tapsyrmasymen qolǵa alynǵan bul joldyń qurylysy joba boıynsha 2021 jyldyń sońyna deıin aıaqtalýy tıis.
Batys Qazaqstan oblysy
