Jambyl oblysy Polısııa departamentiniń bastyǵy Janat Súleımenovtiń nusqaýyna sáıkes, 13-19 qazan aralyǵynda Taraz qalasynyń aýmaǵynda jergilikti jáne respýblıkalyq BAQ ókilderiniń qatysýymen "Quqyqtyq tártip" jedel-aldyn alý is-sharasy ótti. Jýrnalıster zań talaptaryn buzýshylyq derekterine, sondaı-aq jol qaýipsizdigi erejelerin saqtamaǵan tulǵalardyń ustalǵanyna kýá boldy, oıyn-saýyq jáne basqa da mekemelerde júrgizilgen reıdterge qatysty. Jol qaýipsizdigi jelisi boıynsha 891 ákimshilik hattama toltyrylyp, 39 avtokólik aıyppul turaǵyna qoıyldy. Segiz mıllıon teńgeden astam somaǵa aıyppul salyndy, 6,4 mıllıon teńge óndirip alyndy. Alkogoldik ishimdikterdi ishkeni jáne qoǵamdyq oryndarda mas kúıinde bolǵany úshin oblystyq narkodıspanserge 367 tarazdyq ornalastyryldy. 100-den astam jasóspirim eresekterdiń qaraýynsyz túngi ýaqytta turǵyn úıden tys jerde bolǵany úshin ustaldy, olardyń ata-analary QR ÁQBtK-niń 442-baby boıynsha ákimshilik jaýapkershilikke tartyldy (kámeletke tolmaǵandardyń zańdy ókilderiniń erip-júrýinsiz túngi ýaqytta oıyn-saýyq mekemelerinde nemese turǵyn úıden tys jerde bolýy). Onyń ishinde kámeletke tolmaǵandardyń oıyn-saýyq mekemelerinde bolýynyń 14 deregi anyqtaldy. Keıbir dámhanalar men meıramhanalardyń ákimshileri ÁQBtK-niń 132-baby (Kámeletke tolmaǵandardyń túngi ýaqytta oıyn-saýyq mekemelerinde bolýyna jol berý) boıynsha ákimshilik jaýapkershilikke tartyldy. Polısııa qyzmetkerleri túngi ýaqytta alkogol ónimderin satýdyń jolyn kesýge, sondaı-aq kámeletke tolmaǵan jasóspirimderdiń qadaǵalaýsyz júrýine basa nazar aýdardy. Qylmystyq quqyq buzýshylyq jasaǵany úshin 22 adam, onyń ishinde 12 – esirtki zattaryn zańsyz saqtaǵany jáne paıdalanǵany úshin, 10 – ótkir keskish zattardy, sonyń ishinde kastetter men pyshaqtardy saqtaǵany jáne alyp júrgeni úshin ustaldy. Sonymen qatar, mas kúıinde kólik quralyn basqarǵany úshin tórt júrgizýshi jáne kólik quralyn basqarý quqyǵynan aıyrylǵan bir júrgizýshi jaýapkershilikke tartyldy.
– Qoǵamdyq oryndar men kóshelerde quqyq tártibin qamtamasyz etý, qylmystyń aldyn alý jáne jolyn kesý maqsatynda jedel aldyn alý is-sharasy barysynda barlyǵy 2859 ákimshilik quqyq buzýshylyq anyqtaldy. "Quqyqtyq tártip" JASh aldaǵy ýaqytta da óz jalǵasyn tabady, – dep qorytyndylady sózin Taraz qalasynyń PB JPQb bastyǵy Sábıt Mamytbekov.
