Nur-Sultanda "Han Shatyr" SO alańynda sońǵy aýylsharýashylyq jármeńkesi ótip jatyr. О́ńirlerden sharýalar 300 tonna aýyl sharýashylyq ónimderin ákeldi.
“10 shaqty etpen aınalysatyn saýdager jumys jasaýda. Ettiń kóp mólsheri Aqmola oblysynan ákelindi, sıyr etin 1 700 tg satýdamyz. ShQO 30-40 tonna jylqy etin usynyp otyr, baǵasy 1 900 tg, qazy-qarta, jal-jaıa 2 100 tg saýdalanýda. Barlyq azyq-túlik ishinen et ónimi jaqsy ótip jatyr”, – deıdi qalalyq ákimdiktiń ókili Ermek Shırekbaev.
Kókónister men jemister suranysqa ıe. Jármeńkede bir kılogramm kartop nemese sábizdi 80 teńgege satyp alýǵa bolady.
"Pavlodar oblysynan 10 tonna kartop ákeldik, baǵasy turaqty, sapaly ónim dep aıtýǵa bolady. Jalpy alǵanda 40 tonnadan asa kókónis ónimi ákelindi. Sonymen qosa sábiz ben pııazdy da arzan baǵaǵa alasyzdar. “Qystyń qamyn jazda oıla” demekshi, halyq kóp kelýde jáne kókónisterdi qappen alýda”, – deıdi M-AGRO ókili Darhan Saıdildın.
Aýyl sharýashylyq taýarlary tikeleı óndirýshilerden deldalsyz jetkiziledi. Demek taýar quny arzan bolady. Jylqy eti – 1 900 tg, sıyr eti – 1 700 tg, qoı eti – 1 700 tg, qus eti – 900-1 200 tg, jumyrtqanyń bir sanaty 350 tg, bal – 1 500-2 000 tg, shujyq – 1 400-2 000, kókónister kartop 80-90 tg, qyzanaq-qııar 400 tg, alma 300-400 teńgeden satylady.
Jármeńkede birneshe dıler kompanııalary: Pavlodar oblysynyń "Rýbıkom" JShS, "Kregel" JShS jáne Soltústik Qazaqstan oblysynyń "Panchenko" kondıterlik fabrıkasynyń ónimderi saýdalanýda. Uıymdastyrýshylardyń aıtýynsha, mundaı aımaqtyq jármeńkeler azyq-túlik baǵasyn turaqtandyrý, óńiraralyq yntymaqtastyqty damytýǵa yqpal etedi.
Qaladaǵy epıdemıologııalyq jaǵdaı eskerile otyryp, is-shara barlyq sanıtarlyq erejeler men karantın talaptaryn saqtaı otyryp ótkiziledi. Kelýshilerge maska taǵý, sanıtaızerlerdi paıdalaný jáne qashyqtyqty saqtaý talaptary qoıylǵan.
Esterińizge sala keteıik, jármeńkeler qyrkúıek aıynyń basynan bastap, ár demalys kúnderi ótkizildi. Osy ýaqyt ishinde sharýalar Nur-Sultanǵa 4 300 tonnadan astam ónim ákeldi. Turǵyndar suranysynan soń, qalada jármeńkelerdi ótkizýdi qazan aıynyń sońyna deıin uzartý týraly sheshim qabyldandy.
