Polıseıler sońǵy úsh kún ishinde qaladaǵy avtobýs júrgizýshileri arasynda 400-den astam quqyq buzýshylyqty anyqtap, ákimshilik hattama toltyrdy. Reıd barysynda qoǵamdyq kólik júrgizýshileriniń eń qarapaıym jol erejelerin saqtaı bermeıtinderi anyqtaldy. Máselen, 24 júrgizýshi jolaýshylar tasymaldaý erejesin óreskel buzǵan, reıske shyqqan 16 qoǵamdyq kólik mindetti tehnıkalyq tekseristen ótpegen. 60 júrgizýshi kólik júrgizip kele jatyp uıaly telefondy paıdalanǵan, 24 júrgizýshi jyldamdyqty asyrǵan. Reıd barysyndaǵy osy zań buzýshylyqtarǵa baılanysty "Avtopark" JShS mekemesiniń 7 laýazymdy tulǵasy ákimshilik jaýapkershilikke tartyldy.
Sondaı-aq júrgizýshiler eń jıi buzatyn zań buzýshylyqtarǵa kólik basqaryp kele jatyp telefonmen sóılesý, jyldamdyqty arttyrý, toqtaý syzyǵynan shyǵyp ketý, jaıaý júrginshilerge jol bermeýdi jatqyzýǵa bolady. Reıd qorytyndysy boıynsha kólik basqaryp otyryp uıaly telefonmen sóılesken júrgizýshilerdiń árqaısysyna 13 myń teńge kóleminde aıyppul salyndy.
Qoǵamdyq kólik júrgizýshileri avtobýs salonyndaǵy jolaýshylar qaýipsizdigine de, kóshedegi qozǵalys erejelerin saqtaýǵa da birdeı jaýapty. Alaıda quzyrly mekemelerdiń jıi-jıi eskertýine qaramastan, qoǵamdyq kólik júrgizýshileriniń arasynda jaýapkershilikti sezinbeıtinder jıi ushyrasady. Olardyń qyzmetine qatysty shaǵymdar da azaımaı tur. Aıta ketý kerek, bıylǵy jyldyń toǵyz aıy ishinde qoǵamdyq kólik júrgizýshileriniń kesirinen 9 jol-kólik oqıǵasy bolyp, odan 7 adam jaraqat alyp, 1 adam qaıtys boldy.
