Munaıly aýdandyq ákimdigi baspasóz qyzmeti bergen aqparatqa súıensek, 29 jastaǵy kópbalaly ana Gúlzııa Qoılyǵulova atalǵan aýdandaǵy Mańǵystaý-1 aýylynda turady. Nátıjeli jumyspen qamtý jáne jappaı kásipkerlikti damytý baǵdarlamasynyń bıznes ıdeıany iske asyrý baǵyty boıynsha oqýǵa qatysqan ol bastapqyda balalarǵa arnalǵan attraksıon ashýdy oılady. Alaıda oqý barysynda marketıngtik taldaý, suranys degen uǵymdardy úırenip oıyn kúrt ózgertedi. Ol kúndelikti shyǵyny qaı nársege ketetinin anyqtaı kele kir sabyn jasaý bıznesine toqtalǵan. Oıyn ábden bekitip, táýekelge bel býǵan Gúlzııa kóp keshikpeı qajetti qural-jabdyqtaryn alyp, sabyndy daıyndaıtyn jáne kesetin qurylǵylardy satyp alady.
Gúlzııa qazirgi tańda Atameken aýylynda ornalasqan kishigirim sehta kúnine 2 myńǵa jýyq kir sabyn daıyndaıdy. Kásip ıesi shıkizatqa «KFC», «Barhan býrger», «Kaspıı grıl» tez tamaqtaný ortalyqtarmen birlesken kelisimshart negizinde qol jetkizedi. Al daıyn ónimderin aýdannyń ortalyq bazaryna, Aqtaýdaǵy sýpermarketterge jetkizip, saýda sórelerine ornalastyrady.
– Meniń bir aıdaǵy taza tabysym 100 myń teńgege deıin jetedi. Endigi josparym – kir sabyndy keptiretin jáne syrtyn qaptap shyǵaratyn qurylǵylardy alý. «Bastaý Bıznes» jobasynyń erekshe ári qajetti kásiptiń ashylýyna septigin tıgizgenine rızamyn, bilikti mamandarymyzdyń kásiptiń negizderine úıretip, baǵyt bergeni qýantady, – deıdi kásipker Gúlzııa Qoılyǵulova.
Tanys-bilis otbasynda aıaýly ana, súıikti jar bola alǵan jáne otbasynyń qym-qýyt tirligi tasasynda qalyp qoımaı, kásiptiń urshyǵyn ıirgen jas ananyń tabandylyǵyna tánti.
Mańǵystaý oblysy
