Tirligi alǵa basqan Alǵa

Qazirgi kezde Alǵa aýylynyń ózinde 2 500 adam turady. Osy kúnge deıin talapqa saı bilim oshaǵy bolmaǵandyqtan, aýyl turǵyndary balalaryn aýyl irgesindegi Shý qalasyndaǵy nemese aýdan ortalyǵy Tóle bı aýylyndaǵy mektepterge oqýǵa berip otyr eken. Aýyl turǵyndarynyń aıtýynsha, osy kúnge deıin oqýshylar oqyp kelgen mektep alpysynshy jyldary jataqhana retinde salynǵan. Bul jerde sol ýaqytta Alǵa aýylyna jumys isteýge kelgen vetnamdyqtar turypty. Ol da qazirgi kezde eskirgen, tozǵan. Búginde turǵyndardyń tilegi eskerilip, memleket qoldaýynyń nátıjesinde 300 oryndyq mektep salynýda. Úsh qabatty, eńseli, barlyq talapqa saı bilim oshaǵynda ázirge bir aýysymda 300 bala bilim alady dep josparlanǵan. Alǵa aýyldyq okrýginiń ákimi Baǵdat Esbergenovtiń aıtýynsha, eger turǵyndar túgeldeı balalaryn osy mektepke qaıtadan beretin bolsa, onda bala sany taǵy artady. Degenmen, ol oqýshylardy eki aýysymda da oqytýǵa múmkindik bar ekenin aıtty. Jańa mektep jaqynda paıdalanýǵa beriledi.

Aýyldaǵy negizgi máselelerdiń biri bolyp kelgen kóshelerdi jóndeý jumystary da bıyl júzege asyrylýda. «Aýyl – el besigi» memlekettik baǵdarlamasynyń aıasynda Alǵa aýy­lyn­daǵy 2,5 shaqyrym bolatyn eń uzyn kóshe jaryqtandyrylyp, asfalt tóse­lýde. Jalpy, aýylda 7 kóshe bar eken. Bıyl Mánshúk Mámetova, Halyq Toıǵululy, Jobalaı Bekishuly, Kálen Qabyshuly, Kenenbaı Barmaqov, Bolat Degeshuly atyndaǵy 6 kóshe bir mezgilde asfalttalǵan. Atalǵan kóshelerdiń uzyndyǵy 8 shaqyrymdy quraıdy.

«Bul jumystar aǵymdaǵy jylǵy shilde aıynda bastalyp, qyrkúıek aıynda aıaq­tal­dy. Joldardyń sapasy jaqsy. El jol­dyń ıgiligin kórip otyr. Aýyl tur­ǵyn­da­ryn qoldap, tıisti kómek kórsetip otyrǵan memlekettiń jáne ob­lys­tyń basshylaryna alǵys aıtamyz», deıdi aýyl aqsaqaly Yrysbaı Raıysov.

Sol sııaqty «О́ńirlerdi damytý» baǵ­darlamasy boıynsha Saýytbek eldi­ mekeninde de birqatar kóshe jón­del­gen.

Bıyl aımaqta qolǵa alynǵan «Asar­la­typ úı salý» jobasy Alǵa aýy­lyn­da da júzege asýda. Jergilikti jurt bir kisideı ju­mylyp, jalǵyzbasty ana Orazkúl Saý­ryqovaǵa baspana salyp beripti. Aýyldaǵy azamattardyń aýyzbirligine tánti bolǵan ana kópke alǵys aıtýda. Aýyl ákimi Baǵdat Esbergenovtiń aıtýynsha, keıbir turǵyndar osy úıdi salý úshin shamasynyń kelgeninshe aqsha, mal, qurylys zattaryn beripti. Orazkúl Saýryqovanyń ózi de qurylys jumys­ta­ryna qajetti dúnıelerge zeınetaqy­synan aqsha bólip otyrypty. Qazir ol óziniń jańa bas­pa­nasynda turyp jatyr. Taǵy bir aıta keterligi, Alǵa aýylyna 20 jyl boıy sý kelmegen eken. Sodan el baqsha salmaı, egin ekpeı, qajetti jemis-jıdek, kókónis sııaqty ke­rek nárselerin irgedegi Shý qalasynan ta­syp kúneltti. Degenmen, jergilikti kásip­ker­lerdiń kómegimen 2,5 mln teńgege 9 shaqyrym kanal qazy­lyp, búginde aýyl turǵyndary sý tapshy­ly­ǵy­nan da qutylǵan. Al kezinde Alǵa, Saýytbek aýyl­daryna gazdy jeke mer­di­ger kompanııa­lar tartqan bolsa, búginde Jaısan eldi mekenine memleket tarapynan gaz tartylýda. Kógildir otyn Shý qalasynan beri tartylyp, árbir úıdiń esiginiń aldyna deıin kelip tur. Endi árbir turǵyn 153 myń teńge tólep, úıine gaz kirgize alady. Bul – turǵyndar úshin qoljetimdi baǵa.

Aýyldaǵy taǵy bir negizgi másele – klýb­tyń joqtyǵy bolyp otyr. Árı­ne eki myń­nan astam turǵyny bar aýyl­ǵa bir mádenı nysan kerek-aq. Endi klýb salynyp, ol aýyl jastaryn tárbıe­leý ortalyǵyna aınalsa deıdi kóp­shi­lik. Alaıda klýb máselesiniń qalaı sheshi­letinin aldaǵy ýaqyt kórsetedi. Mem­le­ket­tiń qoldaýyn kórip otyrǵan Alǵa aýylynyń búgingi tirshiligi osy.

Jambyl oblysy,

Shý aýdany