Sergeı Glazev atap kórsetkendeı, EAEO-da ulttyq valıýtalarda ózara eseptesýge kóshý jumysy júrgizilýde. Biraq olardyń úlesi burynǵysynsha tym qarapaıym. Máselen, odaq ishinde shamamen 50% jáne Qytaımen eseptesýde shamamen 15%-dy qurap otyr.
"Reseıde jáne Qytaıda óz tólem júıeleri, bankter arasynda aqparat almasýdyń elektrondyq júıesi qurylǵan, biraq sharýashylyq qyzmetiniń qatysýshylary ázirge ınfraqurylymnyń bul elementterin óte baıaý paıdalanýda jáne burynǵysynsha bóten valıýtalarda jumys isteıdi. Jaǵdaıatty túbegeıli ózgertýimiz, ózimizdiń Eýrazııalyq valıýta-qarjy júıesin qurýymyz kerek dep sanaımyn. Ol bizdi táýekelderden saqtandyratyn ári senimdi, ashyq, qolaıly, tıimdi jáne sharýashylyq júrgizýshiler úshin salmaq salmaıtyn júıe bolar edi", dep atap ótti Sergeı Glazev.
Ol bul nátıjege qalaı kelý jónindegi óz usynystaryn da estirtti. Onyń pikirinshe, bárinen buryn, ulttyq valıýtalardyń baǵamyn turaqtandyrǵan mańyzdy. "EAEO memleketteri arasynda valıýta baǵamdaryn turaqtandyrýdy qamtamasyz etý jónindegi kelisimge qol qoıý, Eýropalyq odaq elderinde jumys istegen sol "valıýtalyq jylandy" qurý qajettigi pisip-jetildi", dedi Sergeı Glazev.
Ekinshi baǵyt – Eýrazııalyq bırjalardy jáne baǵa belgileý mehanızmderin qalyptastyrý. Bul baǵyt Odaq memleketteriniń basshylary tutastaı maquldaǵan Eýrazııalyq ekonomıkalyq ıntegrasııany damytýdyń 2025 jylǵa deıingi strategııalyq baǵyttarynyń jobasynda kózdelgen.
Úshinshi baǵyt – ulttyq valıýtalarda eseptesý úshin artyqshylyqtar berý. Sergeı Glazevtiń pikirinshe, TMD-nyń Memleketaralyq banki kommersııalyq bankterge qaraǵanda neǵurlym tómen tarıftermen konversııalyq operasııalardy qamtamasyz etýde mańyzdy ról atqara alar edi.
Budan basqa, Sergeı Glazev ulttyq valıýtalardaǵy eseptesýlerge valıýtalyq baqylaýdy qoldanbaýdy jáne ózara saýda men birlesken ınvestısııalarǵa kredıt berý jáne qarjylandyrý máselelerin qaraýdy usyndy.
