Qasym-Jomart Toqaevqa kásipkerler quqyn qorǵaý máselesi boıynsha atqarylǵan jumystar men otandyq bıznesti qoldaýǵa qatysty jospar jaıynda baıandaldy.
Rýstam Júrsinov Qazaqstan Prezıdentine sońǵy 4 jyl ishinde 25 myń ótinish qaralyp, onyń 43 paıyzy oń sheshilgenin, kásipkerlerdiń 197 mıllıard teńge kólemindegi múliktik quqyqtary qorǵalǵanyn aıtty. Bıznes-ombýdsmenniń aıtýynsha, sanıtarlyq talaptardy saqtaý jóninde tártip ázirlendi, kásipkerlerdiń, olardyń jumysshylary men tutynýshylarynyń arasyndaǵy jaýapkershiligi aıqyndaldy.
Memleket basshysyna koronavırýs pandemııasynyń otandyq bızneske tıgizgen saldary jáne kásipkerlerge qoldaý kórsetý jónindegi usynystar týraly aqparat berildi. Naqty aıtqanda, eńbekaqy tóleý qory, jer qatynastary, salyq máseleleri jan-jaqty aıtyldy.
Qasym-Jomart Toqaev jer qatynastary men eńbekaqy tóleý qoryna salmaq túsirmeıtin jańa retteý saıasaty jónindegi ózgeristerdi tıisti memlekettik organdar muqııat zertteýi qajet ekenin atap ótti. Prezıdent "Bir kózden satyp alý" portalynyń tıimdiligi men ashyqtyǵyna jiti mán berý kerek dep sanaıdy.
Qasym-Jomart Toqaev Rýstam Júrsinovke bızneske qatysty ákimshilik quqyq buzýshylyqtardyń artý sebepterin anyqtaýǵa, baqylaý-qadaǵalaý qyzmetin reformalaýdy ázirleýge baǵyttalǵan birqatar tapsyrma berdi.
