Oqyrmanǵa túsinikti bolý úshin oıyn týraly az-kem aıta ketken jón shyǵar. Total War Saga: Troy – antıkalyq dáýirdegi grekter ómirine arnalǵan strategııalyq oıyn. Onda Gomerdiń «Illıadasy» men «Odısseıinde» aıtylatyn bahadúrler men mıftik jaratylystyń bári qamtylǵan. Máselen, oıynshyǵa grek qaharmandary – Ahıles, Odısseı, Menelaı, Agamemnon nemese Troıa ókilderi – Gektor, Sarpedon, Eneı, Parıstiń birin tańdaý erkindigi berilgen. Osylaısha, el basqarý tizgini berilip, damý strategııasyn qurýy kerek.
Grekterdiń mindeti – Troıany qulatý, al troıalyqtar grek basqynshylyǵynan qutylýy qajet. Bul maqsatqa jetý úshin oıynshy ásker jasaqtap, qaramaǵyndaǵy qalalardy damytyp, ekonomıkasyn aıaqqa turǵyzýy tıis. Sondaı-aq sheteldik basqynshylardan qorǵanyp, óz kezeginde eliniń aýmaǵyn soǵysa júrip ulǵaıtýy kerek. Qysqasy, kádimgi antıkalyq dáýirdiń zamannyń kompıýterlik nusqasy.
Jalpy, joǵaryda aıtyp ótken The Creative Assembly kompanııasy osyndaı erekshe kompıýterlik oıyndar jasaýmen shuǵyldanyp kele jatqanyna 20 jylǵa jýyqtapty. Total war serııasy aıasynda kompanııa eń alǵash ret Shogun oıynyn 2000 jyly jarııalady.
Bul oıyn XV-XVII ǵasyrlarda Japonııada bılik qurǵan Sengoký dáýirine arnalǵan. Qanatqaqty bul jobanyń sátti shyqqany sonshalyq, sol kezeńniń ózinde Shogun-dy mıllıonǵa jýyq adam kóshirip alǵan eken. Bul kompıýter endi-endi damyp jatqan kezeń úshin keremet kórsetkish ekeni túsinikti.
Osyndaı strategııalyq oıynnyń halyqqa unaıtynyn túsingen kompanııa ókilderi munymen toqtap qalǵan joq. Iаǵnı dıplomatııalyq qarym-qatynas jasaý, taq muragerin belgileý, partııaishilik tartys, hanzadalarǵa qalyńdyq áperý, hanshaıymdardy uzatý, shpıon jiberý, óz dinin taratý sekildi tásilder vıdeo oıyndar salasyna jańa lep ákeldi.
Keıinnen orta dáýirge arnalǵan Medieval: Total War jaryq kórdi. Bul oıynnyń ereksheligi oqıǵa jelisi Eýropa men Taıaý Shyǵysqa arnaldy. Uly krest joryǵy, Rım ımperııasy men Vızantııa ımperııasynyń sońǵy kezeńderi, túrikterdiń Osman ımperııasynyń dáýirleýi sekildi tarıhı sátter qamtylǵan. Tipti oıyn barysynda mońǵol shapqynshylyǵy bastalyp, Altyn orda týyn tikteıdi.
Budan keıingi Total War serııalary da tabysty boldy dep aıtýǵa tolyq negiz bar. Máselen, Total War Rome II buǵan deıin bolmaǵan rekordtyq nátıje kórsetip, mıllıondap satyldy. Osylaısha, kompanııany qyrýar paıdaǵa keneltti. Keıinnen bul kórsetkishti fantastıkalyq álemge arnalǵan Warhammer nusqasy basyp ozdy.
Osy oraıda aıta keterligi, oıynnyń Uly dalaǵa qatysty bir-eki elementi bar. Rome II nusqasy bizdiń dáýirimizge deıingi kezeńdi qamtyǵandyqtan, oıynshyǵa basqa da fraksııalarmen birge Massagetterdi, Roksalandardy tańdaýǵa múmkindik berildi. Sondaı-aq Aqtaý qalasy men Saraı qalasy Total War qalalarynyń qataryna endi.
Budan bólek, 2015 jyly jaryq kórgen Total War: Attila nusqasy ǵun kósemi Edil patshaǵa arnalyp, sol dáýirdi tolyqtaı qamtyǵan. Máselen, ǵun kósemderi Rım ımperııasyna jıi-jıi shapqynshylyq jasaıdy. Oǵan qosa, oıynda kóshpendilerdiń ómir salty, táńirlik dini eskerilgen. Qysqasy, ǵundarǵa arnalǵan nusqasy da jurt tarapynan qoldaýǵa ıe bolyp, alǵashqy aptada 11 mıllıon danasy satyldy.
Vıdeo oıyndar janryndaǵy osyndaı málimetterge qarap otyryp oıǵa qalasyń. Tarıhty qoparsań, Uly dalanyń oǵlandary mingen attyń tuıaǵy qart qurlyqty dúbirge toltyrǵany málim. «Barar jeriń – Balqan taý, Ol da bizdiń barǵan taý», dep ata-babalarymyz beker aıtpasa kerek. Endeshe, tarıhı málimetterdi negizge ala otyryp, Altyn ordaǵa nemese Qazaq handyǵyna qatysty kompıýterlik oıyn jasaý artyq etpes edi. Joǵaryda aıtyp ótken The Creative Assembly kompanııasymen kelisip, Total war serııasynyń aıasynda bir nusqasyn osyǵan arnasa, elimiz ben ótkenimizdi álemge tanytýǵa múmkindik beretini anyq. Sol kezde álem bizdi Uly dala eli dep biler edi.
