Mysyr astanasy Kaır ortalyǵynda tártipsizdikter oryn aldy. Bul týraly Mysyr densaýlyq saqtaý mınıstrliginiń aqparyna silteme jasaǵan ITAR TASS habarlady.
Oqıǵa saldarynan bir adam qaza taýyp, 50-den astamy jaraqat aldy. Medıkterdiń aıtýynsha, qaza bolǵan jas jigittiń basyna bytyra oǵy tıgen. Ol alǵan jaraqattarynan aýrýhanada kóz jumdy.
Keshe Mysyr eli 2011 jylǵy qarasha aıynda ishki ister mınıstrligi ǵımaratynyń aldynda bolǵan qaqtyǵystan qaza tapqandardy eske aldy. Ol qaqtyǵys 40-tan asa adamnyń ómirin qıyp ketken edi. 19 qarasha kúni túrli saıası qozǵalystar, onyń ishinde «Musylman baýyrlar» da Tahrır alańynda narazylyq aksııasyn uıymdastyrmaq bolǵan. Degenmen, kúni boıy Kaırde tynyshtyq saqtalyp turdy. Barlyq jerde qaýipsizdik sharalary kúsheıtildi. Alańnyń ózine de halyq az jınalǵan edi. Alaıda, keshke qaraı, Mysyrdyń fýtboldan qurama komandasy álem chempıonatyna irikteý oıynynda Ganadan jeńilis tapqan soń Kaır ortalyǵyna jastar shoǵyrlana bastady. IIM málimeti boıynsha, ashynǵan jastar Arab memleketteri lıgasynyń shtab-páterine basyp kirmek bolǵan. Sondaı-aq olar tártip saqshylaryna shabýyl jasap, tas laqtyrǵan. Qaýipsizdik kúshteri tártip buzýshylarǵa qarsy kóz jasaýratatyn gaz qoldanyp, olardy yǵystyrý úshin bytyra oqtarymen atqan eken.
Aıdar О́risbaev.
