Álemdik sarapshylar búginde vırýs juqtyrý men onyń qurbandarynyń sany jarııalanyp otyrǵan málimetterge sáıkes kelmeýi múmkin ekenin aıtady. Sebebi test tapsyrý deńgeıi barlyq elde birdeı emes, buǵan qosa aýrý sanyn jasyryp, kemitip kórsetýdi de joqqa shyǵarýǵa bolmaıdy.
* * *
Scientific American basylymynda 26 qazanda jaryq kórgen ǵylymı maqalada COVID-19 vırýsyna tolerantty adamdar bar ekeni aıtylady.
Qytaı men Amerıka ǵalymdary mundaı adamdardyń boıynda COVID-19 damymaıtynyn, vırýs bar ekeni belgisiz kúıde ótetinin atap ótti. Alaıda ondaı adamdar aǵzasynda COVID-19 uzaq ýaqyt saqtalyp, aýrý tasymaldaýshy bolady. Mysaly, vırýs anyqtalǵan 3 pasıentte burynnan sozylmaly sýsamyr, gıpertonııa tárizdi aýrýlar bolǵanymen, olarda COVID-19 belgileri aǵzanyń toleranttylyǵy arqasynda esh bilinbegen.
«Bul adamdarda aýrý belgileri aıqyn kórinbegenimen, vırýstyń aǵzada 50 kúndeı uzaq saqtalýy olardyń vırýsqa qarsy turýdaǵy joǵary ımmýnıtetinen emes, joǵary toleranttylyǵyna baılanysty», deıdi ǵalymdar.
* * *
Reseılik Abdýllo Hodjaev atty dáriger-otolarıngolog COVID-19 indetinen soń ıis sezý qabiletin qaıtarý ádisterimen bólisti.
Mamannyń aıtýynsha, ıis sezý qabileti qaıta oralý úshin aýa aǵyny júıke talshyqtaryna tikeleı kelip turatyndaı jaǵdaı qajet. Sol úshin tamyrlardy taryltatyn preparattar qabyldap, muryndy teńiz tuzynyń eritindisimen jıi shaıyp turý kerek. Al tuzdy úıde de eritip paıdalansa bolady. Sondaı-aq V tobyndaǵy dárýmender men polıvıtamınder ishý kerek. Pasıentter ishimdik pen nıkotınnen múlde alystap, osy tásilderdi qoldansa, ıis sezý tezirek qalpyna keledi.
* * *
DDU basshysy Tedros Adanan Gebreısýs kúz ben qys aılarynda soltústik jartyshar turǵyndaryna COVID-19 qaýip-qateri qatty tónip tur degen boljam jasady.
«Keı memleketter úshin aldaǵy aılar qıynǵa túsedi, olar vırýs taralýy qaýipti aımaq sanalady», deıdi ol.
Rasynda, búginde soltústik jartyshardaǵy memleketterde vırýstyń órshýi adamzat balasyn alańdatady. Eýropanyń teńiz jaǵasyndaǵy jyly da qolaıly túbekterin jaılaǵan memleketter aýrý zardabyn tartýda. Ispanııa, Italııa turǵyndary arasyndaǵy aýrý taralý kóktemdegi vırýs tasqynyn jolda qaldyrdy. Sol sebepti Apennın túbegin jaılaǵan jurt úshin barlyq kınoteatr men sport zaly, basseın men teatr ataýlynyń esigi tars jabyldy. Meıramhanalar men barlar belgili bir ýaqytqa ǵana ashylady jáne kópshiliginde tapsyrys boıynsha úılerge jetkizip berý qajettiligi eskertilgen.
* * *
Germanııadaǵy Soltústik Reın-Vestfalııa premer-mınıstri Armın Lashet federaldy aımaqtyń densaýlyq saqtaý salasyn kúsheıtý qajet dep sanaıdy.
Sol úshin býndesverdiń jáne aımaq bıliginiń myńdaǵan qyzmetkeri aımaqqa baryp, COVID-19 taralýyn aýyzdyqtaý boıynsha maqsatty túrde jumys isteıtin bolady. Buǵan qosa Germanııa halqyn maýsymdyq tumaýdan saqtaý úshin de is-sharalar qabyldanǵan. Osy maqsatta memleket 27 mln vaksına satyp alǵan kórinedi.
