Atalǵan joldy qaıta jańǵyrtý Atyraý qalasynyń shekarasynan bastalyp, Qurmanǵazy aýdanyndaǵy Ganıýshkın aýylyna deıingi 616-833 shaqyrymyndaǵy ýchaskede iske asyrylýda. Joba tórt ýchastkege bólingen. Jolshylar jer tósemin salý, jasandy qurylymdar men tómengi qabatyn ornatý jumystaryn júrgizip jatyr. Indýstrııa jáne ınfraqurylymdyq damý mınıstrligi usynǵan málimetke súıensek, jobanyń merdigerleri retinde birneshe kompanııa tartylǵan. Olar – «Lıankıaran Iol Tıkıntı» AAQ, «Todini Construzioni Generali S.p.A», «Ant Insaat Maden Sanayi A.S.» jáne «Sıne Mıdas Stroı» BK» JShS. Jol qurylysyn Eýropa qaıta qurý jáne damý banki qarjylandyryp otyr. Al «Renardet S.A» birlesken kásiporny & Aarvee Associates Architects Engineers & Consultants Pvt. Ltd», «ZS Engineering» JShS tehnıkalyq baqylaýdy júzege asyrady.
Jobaǵa sáıkes, joldyń 217 shaqyrymdyq ýchaskesinde 8 ótkel salynyp, 63 sý qubyry ornatylmaq. Osynsha shaqyrymǵa sozylatyn tas joldy rekonstrýksııalaý 2023 jyly aıaqtalady. Sol kezde bul tas jol eki jolaqty qozǵalysy bar ekinshi tehnıkalyq sanatqa sáıkes bolady. Bul, árıne, joldaǵy ýaqytty aıtarlyqtaı qysqartyp, óńirdiń tranzıttik áleýetin arttyrmaq. Budan bólek jergilikti turǵyndarǵa jol boıyndaǵy servıstik qyzmet kórsetýdi damytyp, kásibin dóńgeletýge múmkindik beredi.
Mınıstrliktiń málimeti boıynsha Atyraý óńirinen Reseı shekarasyna deıingi aralyqtaǵy joldyń uzyndyǵy 277 shaqyrymdy quraıdy. Byltyr qurylys jumystary Reseı shekarasynan beri qaraı 60 shaqyrymdyq ýchaskede bastalǵan bolatyn. Ondaǵy qozǵalys jyl sońyna deıin ashylady dep kútilýde. Bul ýchaskedegi qaıta jańǵyrtý jumystary respýblıkalyq bıýdjettiń qarajatyna júrgizilip jatyr.
Jol salý jumysy Atyraý qalasynyń mańyndaǵy shaǵyn aýyldarda da qolǵa alynyp otyr. Máselen, jol máselesi 1 myńǵa jýyq aýlasy bar Bereke aýylyndaǵy basty problemanyń biri edi. Munda asfalttyń joqtyǵynan jańbyr jaýsa, joldyń bári mı batpaqqa aınalyp shyǵa keledi. Endi turǵyndar sol qıyndyqtan qutylmaq. Atyraý qalalyq turǵyn úı-kommýnaldyq sharýashylyq bóliminiń bas mamany Erjan Haınollaevtyń aıtýynsha, jaqyn arada aýylda 19 shaqyrym asfalt tóseledi. Búgingi tańda aýyldyń 13 kóshesinde joldyń negizgi tósemi daıyndaldy. Bul aýlada 42 kóshege asfalt tóseledi.
Shahar aýmaǵynda, oǵan irgeles eldi mekenderde salynyp jatqan joldyń sapasyn Atyraý qalasynyń ákimi Qaırat Orazbaev baqylaýyna aldy. Ákimniń tapsyrmasymen asfalt tóseý prosesi vıdeoǵa túsirilip, qalalyq turǵyn úı-kommýnaldyq sharýashylyq bólimine esep retinde jiberiledi. Osyǵan oraı merdigerdiń usynysymen jol sapasyn baqylaıtyn zerthana jumys isteıdi. Osyndaı baqylaýmen Erkinqala aýyldyq okrýginiń tórt kóshesinde 3,1 shaqyrym jol asfalttaldy. Bul aýylda uzyndyǵy 60,2 shaqyrym joldy jóndeý josparlanypty.
Qala irgesinde jańadan boı kóterip jatqan shaǵyn aýdandarda da jol qurylysy qarqyn ala bastady. Máselen, «Aqsaı-2» shaǵyn aýdanynyń 29 kóshesinde 27,8 shaqyrym jol jóndeldi. Endi taǵy 16 kóshede 15,3 shaqyrym asfalt tóseý kózdelip otyr. «Tasqala-3» aýylynyń turǵyndary úshin jol qurylysy sál erterek aıaqtalady. Jyl sońyna deıin jobada qarastyrylǵan 8,8 shaqyrym tóseledi. Sondaı-aq «Atyraý-1» kentindegi 24 kóshede 19,5 shaqyrym jol tóseý jumysy aıaqtaldy. Al jaqynda 33,3 shaqyrym trotýar salý boıynsha josparlanǵan jumystar iske asyrylady.
Sonymen qatar Damba-2 aýylynda 2,2 shaqyrymdyq 7 kóshege asfalt tóseý josparlanýda. Osy aýylǵa qońsy qonǵan «Jańatalap-1» shaǵyn aýdanyndaǵy 24 kóshede 21,1 shaqyrym paıdalanýǵa berildi. Bul jumystardy merdigerlikke tańdalǵan «Atyraýınjstroı-AIS», «KazahDorStroı» jáne «Atyraýkólik» seriktestikteri júrgizip jatyr.
Atyraý oblysy
