TALAP KÚShEITILÝI – ZAŃDYLYQ

Májilis Tóraǵasy Oral Muhamedjanovtyń jetekshiligimen ótken palatanyń sársenbi kúngi plenarlyq otyrysynda qyzmet merzimderi aıaqtalǵan M.A.Sársembaev pen V.K.Foos Ortalyq saılaý komıssııasy múshelegine qaıta saılandy. Sondaı-aq depýtattyqqa taǵaıyndalǵan Q.Ydyrysov Qarjy jáne bıýdjet komıtetiniń quramyna saılandy. Ádettegi depýtattyq saýaldar bul joly bir jarym saǵatqa sozylyp ketkendigin aıta ketý kerek. Tipti spıkerdiń ózi saýal­dar­dyń qysqa da nusqa bolýyn talap etip otyrdy. Bul joly da depý­tat­tar Qyzylaǵash apatyn aınalyp ót­ken joq. Qyrǵyzstandaǵy saıası jaǵdaıǵa baılanysty da áńgime qozǵaldy. Zań jobalarynyń ishinde “Qazaqstan Respýblıkasynyń áýe keńistigin paıdalaný jáne avıasııa qyzmeti týraly”  jáne soǵan jap­sar­las zań jobalary depýtattardyń erekshe qyzyǵýshylyǵyn týdyrdy. Kólik jáne kommýnıkasııa mı­nıstri Ábilǵazy Qusaıynovtyń aı­tý­ynsha, IKAO talaptarynda eldiń avıasııa jónindegi zańnamasyna  aza­mattyq avıasııa qyzmeti men onyń memlekettik júıesin qalyp­tas­tyrý úshin myqty irgetas qalyp­tastyrylýy tıis dep jazylypty. Olaı bolsa, elimiz IKAO-nyń 11 myń standartyn qabyldaýy jáne ulttyq zańnamalarǵa engizýi tıis eken. Qazirgi tańda atalǵan avıasııa uıymy quramynda 192 memleket bar. Osy uıymnyń múshesi bolyp tabylatyn Qazaqstanda 611 áýe ke­mesi bolsa, sonyń 66-sy sheteldik ónimder eken. Jolaýshylar tasy­ma­lynyń 85 paıyzyn osy áýe ke­me­leri júzege asyratyn kórinedi. Mı­nıstr áýe kompanııalaryna bir­qatar talaptardyń kúsheıtilgen­digi­men bólisti. Máselen, endi ýákiletti organ kelisim bermeı, qarý-jaraq pen áskerı tehnıka jáne ózge de mańyzdy júkter tasýǵa ruqsat etil­meıdi. Sonymen bir mezgilde shaǵyn avıasııaǵa jol ashylmaq. Áýe ke­me­si­niń usha alatyndyǵy týraly ser­tı­fıkat pen ushqysh kýáligi bolsa, kez kelgen jeke tulǵa tómen bıik­ter­de samǵaı alady. Ol úshin óńir­lik aeroklýbtar ashý kózdelip otyr eken. Osy rette mınıstr depýtat­tar­dyń kóptegen suraqtaryna da jaýap berdi. Onyń málimetine qarǵanda, qazirgi kezde elimizde 20 áýejaı bar kórinedi. Sonyń tek 5-eýi ǵana jekege tıesili eken. 2020 jylǵa qa­raı barlyq áýejaılar halyqara­lyq talaptarǵa saı jaraqtan­dy­ry­lýy tıis. Kadr máselesinde ótken jyldyń aqpan aıynda Azamattyq avıasııa komıtetinde 35 ushqysh tirkeýde bolsa, qazir olardyń sany 51-ge jetipti. “Ár jyl saıyn AQSh-tyń Florıda shtatynda on­daǵan qazaqstandyq kýrsant oqy­tylyp jatyr”, deıdi mınıstr osy oraıda. Arnaıy ınjenerlik-teh­nıkalyq quramdy daıarlaý maq­sa­tynda Qazaqstanda Rıga avıasııa ınstıtýtynyń fılıalyn ashý tý­ra­ly kelisimder júrgizilýde kórinedi. Negizinen kásipqoı ushqyshtar daıar­laý Astana qalasynda júrgizi­lip otyrǵany da depýtattar nazary­na salyndy. Sóıtip, eki zańdyq qujat ta de­pýtattar tarapynan qoldaý taýyp, birinshi oqylymda maquldandy. Asqar TURAPBAIULY.