– Naýqastardyń birazy vırýsty qaıdan juqtyrǵanyn aıta almaıdy. Sondyqtan kópshilik oryndarda sanıtarlyq talaptardy saqtaý qajettigin halyqqa qaıta-qaıta eskertý qajet, – deıdi oblys ákimi Ǵalı Esqalıev.
Oblysta Sovid-19-dy PTR-testileý arqyly anyqtaıtyn 7 zerthana bar. Bir aptada osy zerthanalardan 9 myńǵa jýyq adam ótken. Testileý quny Batys Qazaqstan oblysy taýarlar men kórsetiletin qyzmetterdiń sapasy men qaýipsizdigin baqylaý departamentiniń arnaıy zerthanasynda 8 220 teńge turady, jekemenshik zerthanalarda 9 myń teńgeden aspaıdy. PTR-test ótýshilerdiń 70 paıyzy joldamamen, tegin ótkizilgen.
– Reseıdegi ahýalǵa baılanysty shekaradaǵy baqylaý kúsheıtildi. Bizdiń mamandar shekara beketinde, tórt avtoótkelde kúni-túni jumys istep jatyr. Sońǵy bir aptada shekaradan 1 158 jaıaý júrginshi ótken. Onyń 1 044-inde PTR-testileý anyqtamasy bolǵan. Al anyqtamasyz ótken 114 adam karantınge jatqyzylyp, onyń úsheýinde PTR-testileý nátıjesi oń nátıje kórsetti. Reseı Federasııasynyń 19 azamatyn qujaty bolmaýyna baılanysty shekaradan ótkizbedik, – deıdi oblystyq bas sanıtarlyq dárigeri.
Shtab otyrysynda belgili bolǵan bir másele – oblys aýmaǵyna shekaradan ótken tranzıttik júrgizýshilerge qatysty. Halyqaralyq kelisimderge sáıkes, tranzıttik kólikter shekaradan kedergisiz ótedi. Sońǵy bir aptanyń ishinde 2 300-ge jýyq tranzıttik júrgizýshi oblys arqyly ótken. Olardyń arasynda vırýs tasymaldaýshylary da bolýy múmkin.
Shekaradan ótetin júrgizýshilerdiń kópshiligi PTR-testsiz, anyqtamasyz keledi. Olardyń ishinde 8 adamnan koronavırýs anyqtalǵan.
– Biz 19 qazannan bastap tranzıttik kólikterdi shekaradan kútip alyp, polısııanyń jetegimen alyp júremiz. Aqtóbe, Atyraý, Tasqala, Samara jaǵynan kúndiz tórt ekıpaj, túnde tórt ekıpaj osy qyzmette júr. Osy jerde bir másele týyndaıdy: keıbir tranzıttik kólikter qala ishindegi kempıngterge aıaldap, toqtap qalady. Olardy qashan qaladan shyǵyp ketkenshe baqylap júrý múmkin emes. Sondyqtan qala ishindegi kempıngterdiń tranzıttik kólikterge qyzmet kórsetýin shekteıtin tártip kerek. Oblystyń bas sanıtar dárigeri osy máselege arnaıy qaýly shyǵarsa, – degen usynysyn bildirdi Batys Qazaqstan oblystyq Polısııa departamenti bastyǵynyń orynbasary Janbolat Janshın.
Al Ǵ.Esqalıev keıbir turǵyndardan aryz túskenin, shekaradan ótip jatqan tranzıttik kólikterdiń ishinde kólikke, júkke qatysy joq reseılik azamattar bolýy múmkin ekenin alǵa tartty.
– Mundaı aryz bolǵanymen, ázirge dáleldengen joq. Reseıden keletin júk kóliginde ekinshi júrgizýshi bolady. Olardyń keıbirinde sol kólikti júrgizýge ruqsat beretin tıisti kategorııa bolmaǵan oqıǵa kezdesti. Osyǵan qarap, shekaradan ótip ketý úshin olar júrgizýshimen qandaı da bir somaǵa kelisip alýy múmkin degen kúmán týady. Biraq muny tekserý qıyn, – dedi shekara qyzmetiniń ókili.
Ǵ.Esqalıev bul máseleni respýblıkalyq deńgeıde kóterýdi tapsyrdy.
