Jaqynda «Atameken» Ulttyq kásipkerler palatasynyń VII sezinde Nur-Sultan qalasy bıyl «Jumyspen qamtýdyń jol kartasy» baǵdarlamasyn júzege asyrýda joǵary nátıjeler kórsetkeni atalyp ótti. Al endi kelesi jylǵa arnalǵan baǵdarlamanyń jobasy 1 jeltoqsanǵa deıin ázirlenýi tıis. Elordanyń halyqty jumyspen qamtý ortalyǵy bul jobanyń Ulttyq bankpen jáne Úkimetpen birlesip júzege asyrylatynyn habarlady.
Halyqty jumyspen qamtýǵa baǵyttalǵan ıgi baǵdarlama nátıjesin kórsetip, qanshama azamat jumysty bolyp, adal eńbek, mańdaı terimen nápaqasyn taýyp otyr. Solardyń biri elordalyq Dáýren Shabdanbekov enbek.kz saıty arqyly jumys taýypty. «Pandemııa bastalǵaly jumyssyz qaldym. Keıin enbek.kz saıtyna tirkelip, jumys izdedim. Mundaı jumysty habarlandyrýdan kóbine taba almaısyń. Al jumyspen qamtý ortalyǵynyń saıtynda kóp jumys orny men tańdaý bar», deıdi ol.
«Jumyspen qamtýdyń jol kartasyna» qatysýǵa kásipkerler de ótinim bere alady. Durys úılestirý arqyly barlyq deńgeıdegi mamandardy tabýǵa bolady. Sonymen qatar jumyspen qamtylǵandardyń arasynan turaqty jumys ornyn tapqandar da bar.
«Bizdiń kásiporyn dıod jaryǵy bar shamdardy shyǵarýmen aınalysady. «Jumyspen qamtýdyń jol kartasy» aıasynda aýqymdy joba boldy. Soǵan 100-den asa adam qatysty. Sonyń ishinen 12-13 adam turaqty jumysqa qabyldandy. Osyndaı jobalar arqyly qoldaý kórsek, biz jumysty jandandyryp, jumysshylardyń sanyn kóbeıtýge daıynbyz», deıdi kásipker Qanybek Aıtaqov.
Baǵdarlama aıasyndaǵy is-sharalar jyl sońyna deıin jalǵasady. Naqtyraq aıtqanda, qurylys nysandaryndaǵy ishki jóndeý jumystaryn aıaqtaý josparlanyp jatyr. Tolyǵyraq málimet alǵysy keletinder halyqty jumyspen qamtý ortalyǵynyń monıtorıng jáne eńbek resýrstaryn boljaý bólimine myna mekenjaı boıynsha habarlasýǵa bolady: Beıbitshilik kóshesi, №25-úı, «О́rken» iskerlik ortalyǵy (tel.: 57-88-89, 57-89-37, 24-83-02).
