Saryaǵash APB-ne “102” symtetigi arqyly “Qazyǵurt” shekara baqylap ótkizý beketinen habarlama kelip túsken. Onda “Nıfı” atty qyzmettik ıt О́zbekstan Respýblıkasyna qaraı ótip bara jatqan “Volvo” markaly júk kóligine úrip, bir belgi bergenin aıtqan. Osy habarlama boıynsha Saryaǵash APB-niń shuǵyl tergeý toby az ýaqyt ishinde shekara beketine tolyq quramda jetken.
Polısııa qyzmetkerleri tekserý barysynda sheteldiktiń kóliginde jasyrylǵan esirtki zatyn tapty. Tintý barysynda jedel ýákilder ózine tán hosh ıisi bar bir paket esirtki zatyn tárkiledi. Saraptama qortyndysyna sáıkes, tárkilengen esirtki zaty 26 gramǵa jýyq keptirilgen “marıhýana” bolyp shyqty.
Qazirgi ýaqytta atalǵan jaıt QR QK-niń 296-baby (Esirtki, psıhotroptyq zattardy, sol tektesterdi ótkizý maqsatynsyz zańsyz daıyndaý, qaıta óńdeý, ıemdený, saqtaý, tasymaldaý) boıynsha qylmystyq is tirkeldi. Búgingi tańda kúdikti ýaqytsha ustaý abaqtysyna qamaýǵa alyndy. Polısııa qyzmetkerleri oqıǵanyń tolyq mán-jaıyn anyqtaýda.
Túrkistan oblysynyń polıseıleri esirtki qoldanyp nemese ósirip ózin ǵana emes búkil qoǵamdy ýlaý zań aıasynda jaýapqa tartylatynyn eskertedi. Qaıta salaýatty ómir saltyn ustanyp, paıdaly áreketter jasap ómir súrýge shaqyrady.
