Sýrette: Masanchı aýylynyń turǵyny Abdýrashıd Bagıev otbasymen birge
"Men elimizdiń Prezıdentine, barlyq qamqor qazaqstandyqtarǵa kórsetilgen kómek úshin rızashylyǵymdy bildirgim keledi. Meniń ákem de, men de osynda dúnıege keldik. Bizdiń Otanymyz – osy", deıdi A.Bagıev.
Abdýrashıdti aýyldasy Iýsýf Parov ta qoldap, óziniń de tirshiligi qalypty kúıge oralǵanyn jetkizdi.
Sýrette: Masanchı aýylynyń turǵyny Iýsýf Parov
"Kómek qolyn sozǵandardyń barlyǵyna - bılikke de, qarapaıym turǵyndarǵa da alǵysymyz sheksiz", deıdi aǵynan jarylyp Iý.Parov.
Qazirgi tańda balalar men jastardyń jıi shoǵyrlanatyn ornyna aınalǵan Masanchıdiń ortalyǵynda tirshilik qyza túsken. Munda "Samuryq-Qazyna" ulttyq ál-aýqat qorynyń qoldaýymen, jergilikti balalarǵa arnalǵan oıyn alańy ashylǵan. Alań átkenshekter, syrǵanaqtar jáne shved qabyrǵalary men besedkalarmen jabdyqtalǵan. Onyń qasyndaǵy zamanaýı shaǵyn fýtbol alańqaıy da jasósipirimderdiń ıgiligine jaraýda.
Sýrette: Masanchı aýylyndaǵy sport jáne oıyn alańqaıy
Oǵan jaqyn mańda kórshi Masanchı jáne Qarakemer aýyldarynyń aqsaqaldary jastardy baqylap, jaıma-shýaq áńgime-dúken qurýda.
Sýrette: Qarakemer jáne Masanchı aýyldarynyń aqsaqaldar keńesi
"Masanchıge qosh keldińizder!", dep aýyldyq okrýgtiń aqsaqaldar keńesiniń tóraǵasy Dydyr Dvýmarov bizdi jyly qarsy aldy.
"Keıingi aılarda biz úlken ózgeristerdi bastan keshtik. Kóshelerdiń barlyǵy derlik asfalttalyp, ınternetpen qamtylyp, mádenı, bilim berý jáne sport nysandary salynýda. Gaz tartylyp, dúkender men úıler qalpyna keltirildi. Ásirese, biz, aǵa býyn jas urpaqty qazaqstandyq patrıotızm rýhynda, memlekettik tildi qurmetteý jáne úırenýge tárbıeleýdemiz. Qazaq tili bizdiń balalarymyzǵa úlken múmkindikter ashady", deıdi aýyl turǵyny.
Sýrette: Dydyr Dvýmarov, Masanchı aýyldyq okrýgi aqsaqaldar keńesiniń tóraǵasy
Onyń Qarakemer aýylyndaǵy áriptesi Erǵazy Bozshaev ta baýyrlas halyqtar arasyndaǵy tyǵyz qarym-qatynas týraly atap ótti.
"Biz árqashan beıbit ómir súrip keldik jáne aldaǵy ýaqytta da tatý-tátti tirshiligimiz jalǵasa beredi. Bizdiń bólise almaı júrgen eshteńemiz joq", dep senim bildirdi Erǵazy ata.
Qarııalarǵa qarap, bul jaı aıtyla salǵan sóz emes ekenin sezinesiz. Syılastyǵy jarasqan qarttar ózara uzaq áńgimelesip, ortaq isterdi talqylady. Olar aýyl jastary úshin fýtboldan joldastyq kezdesý uıymdastyrý, aýyl turǵyndarymen kezdesý sekildi ıgi isterdi josparlap otyr. Aqsaqaldar bir-birin qushaqtap, izgi tilekterin aıtyp, áserli tarqasty.
Sýrette: Qarakemer aýylyndaǵy turǵyn úılerdiń qurylys jumystary
Aıtpaqshy, Qarakemer aýylynda jas mamandarǵa arnalǵan eki páterli 10 úıdiń qurylysy aıaqtalýda, 16 kóshege asfalt tóselip, dárigerlik ambýlatorııa boı kóterdi, sý qubyry qaıta jańartyldy, gaz qubyry tartylýda.
Sýrette: Qarakemer aýylyndaǵy kóshelerdi abattandyrý jumystary
Qordaı aýdanynyń bilim berý salasy da basqa salalar sekildi, naǵyz oń ózgeristerdi bastan ótkerýde. Munyń jarqyn mysaly retinde Masanchı aýylynda salynyp jatqan 600 oryndyq qazaq jáne orys mektebi. Búginde negizgi ǵımarattyń qabyrǵalary turǵyzylyp úlgergen, nysannyń ekinshi ǵımaraty salynýda, olardy ózara úılesimdegi galereıalyq qurylys baılanystyrady. Qurylys 2021 jyldyń tamyz aıynda aıaqtalady dep kútilýde.
Sýrette: Masanchı aýylynda mektep qurylysy
"Bul bilim oshaǵynyń ashylýymen Masanchı aýylyndaǵy mektepterdiń júktemesine qatysty másele sheshilmek. Bilim berý mekemesiniń qurylysynan basqa, 41 kóshe asfalttalyp, balalar men sport alańdary jabdyqtaldy. Gazben qamtý jumystary júrgizilýde. Magıstraldyq gaz qubyry tartylyp, endi kvartalishilik jeliler ornatylýda. Búgingi kúni 140 úı kógildir otyndy tutynýǵa daıyn. Biz gazǵa qosýdy qarashanyń ekinshi jartysyna josparlap otyrmyz", deıdi Masanchı aýyldyq okrýgi ákiminiń orynbasary Hýseın Býlar.
Sýrette: Bıyl Qordaı aýdanynyń 22 aýylynyń turǵyndary gazben qamtylady
"QazTransGaz" Ulttyq operatory Jambyl oblysynyń ákimdigimen birlesip, 73 shaqyrym gaz qubyryn tartty. 3,7 mlrd. teńge ınvestısııalyq baǵdarlama esebinen "QazTransGaz" kompanııasy alǵashqy 42 shaqyrym jelini júrgizip, nátıjesinde О́tegen jáne Qarasý aýyldarynyń turǵyndary gazǵa qosyldy.
О́tegen aýylyndaǵy toǵyz jasar Nursultan anasy Aıgúl Abdýldaevanyń gaz ottyǵyn abaılap tutatyp jatqanyn qyzyǵýshylyqpen tamashalaýda. Bıologııa pániniń muǵalimi osy sátti úıge kelin bolyp túsken kezden, ıaǵnı jıyrma jyldan beri kútken. Búginde ol ala tańnan otyn men kómir daıyndap, jumystan keıin úıge asyǵyp, pesh jaǵyp, sýyq úıdi jylytý sekildi beınetti jumystardy umytqan.
Sýrette: О́tegen jáne Qarasý aýyldarynyń turǵyndary qazirdiń ózinde kógildir otyndy qoldanýda
Joldasy baqıǵa attanǵan Aıgúl jalǵyz ózi tórt bala tárbıelep otyr. Kógildir otynǵa qol jetýimen kóptegen máselelerdiń sheshilgenin jetkizdi. Sonymen birge 233 aýlany quraıtyn atalǵan aýyldyń 24 otbasy da tabıǵı gazǵa qosylyp úlgergen.
Sýrette: Aıgúl Abdýldaeva otbasymen birge
"Jumystar júrgizilýde, kórshi Qarasý aýylynda 1018 úıdiń 127-si gazdandyryldy, merdigermen jasalǵan kelisim-shartqa sáıkes úıge qubyr jetkizýdiń jalpy quny 350 myń teńgeni quraıdy. Tutynýshy bastapqy tólem retinde 100 myń teńge tóleıdi, qalǵan somany aıyna 25 myń teńgeden 10 aıda bólip tóleıdi. Sharttary óte yńǵaıly, adamdar ony tıimdi paıdalanýda", dep atap ótti Qarasý aýyldyq okrýgi ákiminiń mindetin atqarýshy Raıa Jasybaeva.
Bir-eki aptadan keıin ortalyqtandyrylǵan sý qubyry jumys isteı bastaıtyn Aral aýylynyń turǵyndaryn da jaqsy jańalyqtar kútip tur. Jumyspen qamtýdyń jol kartasy sheńberinde sý qabyldaǵysh nysanynyń qurylysy men qubyrlardy júrgizý jumystary aǵymdaǵy jyldyń mamyr aıynyń ortasynda bastalǵan, merdiger "TemirStroıServıs jáne K" JShS Táýelsizdik kúnine deıin sýǵa qosýǵa ýáde berip otyr.
"Biz 20 shaqyrym qubyr tartyq, birinshi jáne ekinshi kótermeli sorǵy stansııalaryn ornattyq, qazirgi ýaqytta aýmaqty abattandyrý jáne jaryqtandyrýmen aınalysýdamyz", dedi "TemirStroıServıs jáne K" JShS ınjener-smetashysy Jalǵasbaı Ulymbetov.
Sýrette: Áljan ana aýylyndaǵy sporttyq-saýyqtyrý kesheniniń qurylysy
Sondaı-aq, qurylysyna 321 mıllıon teńge baǵyttalǵan Áljan ana aýylyndaǵy sporttyq-saýyqtyrý kesheni de Táýelsizdik kúnine deıin paıdalanýǵa berilmek. "Agrospesstroı" JShS basshysy Qaırat Nartbaevtyń aıtýynsha, ishki jumystardyń 95 paıyzy aıaqtalyp, rezervtik dızel generatory ornatylǵan. Taratý shkaf pýnktin qurý úshin arnaıy mamandar tartylǵan.
"Aýa-raıy ázirge qurǵaq jáne jyly bolyp tur, osyny paıdalanyp aýmaqqa asfalt tóseý jumystaryn oryndap úlgerýimiz kerek", dep qosty qurylysshy.
Sýrette: Qordaı aýylyndaǵy turǵyn úılerdiń qurylysy
Atalǵan kompanııanyń taǵy bir ókili, bas dırektordyń orynbasary Nurlan Serikbaev jýrnalısterge aýdan ortalyǵynyń "Batys" alqabyndaǵy 60 páterlik úsh úıdiń qurylysy týraly aıtyp berdi. Qurylys kestege saı júrgizilýde desek, aǵymdaǵy jyldyń 23 jeltoqsanynan keshiktirilmeı tıisti turǵyndar qonys toıyn toılaıdy dep kútilýde. Eki úı de aýdany 65 sharshy metrden aspaıtyn, tórtinshi jaılylyq klasyndaǵy bir, eki jáne úsh bólmeli páterlerden turady. Qurylys basynda 200-den astam adam ter tógýde, olardyń jartysy jergilikti jumyspen qamtý ortalyǵy arqyly qamtylǵan. Tek qana qazaqstandyq qurylys materıaldary qoldanylýda. Úıler 85-90 paıyzǵa daıyn. Demek, jyl sońyna deıin kezekte turǵan 1542 adamnyń birqatary jeke baspanaly bolady dep senimmen aıta alamyz.
О́rkenıet ıgilikteri Áljan ana aýylynyń T.Rysqulov atyndaǵy №23 orta mektebinde de keńinen qoldanylýda. Bilim ordasy О́ńirlerdi damytý baǵdarlamasy aıasynda kúrdeli jóndeýden ótken. Tehnıkalyq qadaǵalaý ókili Emen Kıikbaevtyń aıtýynsha, jumysshylardyń jetispeýshiligi máselesi týyndaǵan. Degenmen jumystar oıdaǵydaı aıaqtalýda, oqý orny ákimshiliginiń jumys sapasyna kóńilderi tolady.
Sýrette: Áljan ana aýylyndaǵy №23 mekteptiń dırektory Álııa Báıgelova
Mektep ashylǵannan beri, ıaǵnı 1972 jyldan bastap kúrdeli jóndeý kórmegen. Endi bastaýysh synyp oqýshylary ashyq jáne keń kabınette bilim alatyn bolady. Barlyq eńbek ujymynyń, oqýshylar men ata-analardyń atynan Memleket basshyna osyndaı tartý úshin alǵys bildiremin, - dedi Álııa Báıgelova qýanyshty kóńil kúımen.
Al Sortóbe aýylyndaǵy "Búldirshin" balabaqshasynyń meńgerýshisi Aısha Idybo mundaı mektepke deıingi bilim berý mekemesi ózge aýdan ortalyqtarynda joq ekenin maqtanyshpen aıtady. Sondaı-aq, ol Jambyl oblystyq "Vynhýa" dúngen etnomádenı ortalyǵy qaýymdastyǵynyń tóraǵasy qyzmetin qosa atqarady. Búgingi tańda qaýymdastyq dúngender arasynda belsendi túrde memlekettik tildi keńinen nasıhattap, úıretýmen aınalysýda.
Sýrette: Masanchı jáne Sortóbe aýylyndaǵy turǵyndardyń basym bóligi qazaq tilin meńgerýde
Sortóbe aýylyndaǵy 110-ǵa jýyq turǵyn eki aılyq qazaq tilin meńgerý boıynsha kýrsqa qatysýda, onyń ishinde mektepke deıingi mekemelerdiń tárbıelenýshileri men tehnıkalyq qyzmetkerleri, kásipkerler jáne ımamdar, sondaı-aq, úı sharýasyndaǵy áıelder de bar. Bizge Taraz qalasyndaǵy "Tilderdi oqytý" ortalyǵynan mamandar arnaıy kelip, nátıjesinde biz tildi bastapqy deıgeıde meńgerip shyqtyq. Ári qaraı da oqýdy jalǵastyrsaq deımiz, óıtkeni, nıet bildirip otyrǵan jandar kóp. Alaıda, qarasha aıyna josparlanǵan oqý kýrsy kelesi jyldyń qańtar aıyna aýystyryldy.
Sýrette: Aǵymdaǵy jyly qazaq tilinde oqytatyn synyptardyń sany artty
"Balabaqshalarda ata-analardyń suranysy boıynsha qazaq tilinde oqytatyn toptar kóbeıdi. Máselen, bizde osy ýaqytqa deıin 7 orys toby jáne 5 qazaq toby bolsa, qazir kerisinshe – jeti qazaq toby men 5 orys toby qurylyp otyr. Taǵy da qaıtalap aıtamyn: bul ózgeristerdiń barlyǵy ata-analardyń suranysyna saı iske asty", dep atap ótti Aısha Lıýshırovna.
Aýdan ákimi Rústem Dáýlet atqarylǵan jumystar men aldaǵy josparlar týraly aıtyp berdi.
Sýrette: Qordaı aýdanynyń ákimi Rústem Dáýlet
"Sizder atqarylǵan jumystardyń birqataryn ǵana kórdińizder. Biraq bul, meniń oıymsha, júrgizilgen jumystyń aýqymyn kórsetý úshin jetkilikti. 392 jobany iske asyrýǵa 35 mıllıardtan astam teńge baǵyttaldy, búginde olar 95 paıyzǵa daıyn. Bul jobalar qordaılyqtar ómiriniń barlyq salalasyn qamtıdy. Atap aıtsaq, gazben jáne sýmen qamtamasyz etý, turǵyn úı jáne jol qurylysy, kóshelerdi jaryqtandyrý jáne abattandyrý, bilim berý, densaýlyq saqtaý, sport salalary boıynsha kóptegen jumystar júrgizildi. Memleket basshysynyń tapsyrmasy boıynsha bıyl aýdan tarıhynda alǵash ret 22 aýyldyń turǵyndary gazben qamtylýda. Sonymen qatar, Tilderdi oqytý ortalyǵy, ımamdar úıi ashyldy. Bes aýyldyq okrýgte qoǵamdyq keńester qurylyp, olar qoǵamdyq-saıası turaqtylyqty nyǵaıtýǵa óz úlesterin qosýda", dep túıindedi Rústem Dáýlet.
