2020 jyldyń 10 aıynda Batys Qazaqstan oblysynda aýylsharýashylyǵy ónimderin óndirý 1,6%-ǵa ósip, 167,7 mlrd teńgeni quraǵan. Saladaǵy eńbek ónimdiligi 2 toqsanda 1,7 ese ósip, 720 myń teńgege deıin jetken. Al salaǵa quıylǵan ınvestısııa kólemi ótken jylmen salystyrǵanda 2,8 ese ósip otyr.
"О́ńir basymdyqtarynyń biri – etti mal sharýashylyǵyn damytý. Iri qara mal basy boıynsha biz respýblıkada 4-oryndamyz. Asyl tuqymdy iri qara mal ósirý boıynsha da aldyńǵy qatarǵa shyǵyp otyrmyz. Al etti baǵyttaǵy iri qara malyn ósirý boıynsha oblysymyz ekinshi orynda", dedi Ǵalı Esqalıev.
Ákimniń aıtýynsha, Tasqala aýdanynda Memleket basshysynyń aýyl sharýashylyǵy kooperatıvterin biriktirý tapsyrmasy boıynsha pılottyq joba engizilgen.
"Jobany tolyqtaı iske asyrý úshin birqatar kedergilerdi joıý qajet. Sol sebepti arnaıy usynysymyzdy Aýyl sharýashylyǵy mınıstrligine joldadyq. Eger osy usynys qoldaý tapsa, aýyl turǵyndardyń tabysy artatyn bolady", dedi Ǵalı Esqalıev.
Memleket basshysy aıtqan 7 ekojúıeniń biri – et baǵyty boıynsha Batys Qazaqstan oblysynyń áleýeti joǵary. Sovet Úkimeti kezinde oblystyń jaıylym jerler kólemi 13 mln gektarǵa jetken. Al búginde tek 7 mln gektar jer ǵana paıdalanylyp otyr.
