Kún sanap aýmaǵy artqan qaladaǵy qaýipsizdik máselesin qalt jibermeı qadaǵalaý úshin myńǵa tarta tártip saqshysy qyzmet etedi. Taımerdenovtiń sózine sensek, qazir megapolıstegi jaǵdaı turaqty. Sońǵy on aıdyń qorytyndysy boıynsha barlyq baǵyttaǵy qylmystar 47,5%-ǵa azaıǵan.
– Atap aıtqanda, qaraqshylyq shabýyl – 2,0 esege, zorlaý – 2,1 esege, tonaý – 2,2 esege, bótenniń múlkin urlaý – 2,4 esege, páter urlyǵy – 3,0 esege, kólik urlyǵy 2,6 esege, kólik ishinen urlaý faktisi – 37,5 esege, kólik qaptalyndaǵy aınalardyń urlanýy – 2,5 esege, buzaqylyq – 2,1 esege, alaıaqtyq 22,5 esege tómendedi. Sondaı-aq qoǵamdyq oryndarda oryn alatyn quqyqbuzýshylyq 2,9 esege, kóshelerde – 3,5 esege, kámelettik jasqa tolmaǵandar jasaǵan quqyqbuzýshylyq – 35,3%-ǵa, uıymdasqan top – 18,9%, otbasylyq turmystyq saladaǵy qylmys 32,4%-ǵa azaıdy, – deıdi Qanat Taımerdenov.
Polısııa departamenti basshysynyń sózinshe, qylmystyq quqyqbuzýshylyq boıynsha jalpy qylmystardyń ashylý kórsetkishi de kóńil kónshiterlik. Nátıje burynǵyǵa qaraǵanda 11,6%-ǵa jaqsarǵan. Ásirese qarýly qaraqshylyq shabýyl, urlyq, páter tonaý, alaıaqtyq sekildi azǵyndyqpen aınalysqandardyń joly kesilgen.
Birer apta buryn qoǵamdyq qaýipsizdikti qamtamasyz etý boıynsha ýchaskelik ınspektorlardyń jumysyn jandandyrý máselesi boıynsha keńes ótkizgen qala ákimi Baqytjan Saǵyntaev, túrli qylmystardyń aldyn alý boıynsha profılaktıkalyq jumystardy kúsheıtýdi tapsyrǵan edi.
Keńes barysynda ýchaskelik ınspektorlardyń jumys nátıjeleri tyńdaldy. Búgingi tańda Almatyda 491 ýchaskelik ınspektor men olardyń 102 kómekshisi qyzmet etedi. Sondaı-aq 102 ýchaskelik pýnkt jumys isteıdi. О́tken jyly qaýipti aımaqtarǵa ornatylǵan 37 modýldik polısııa beketine bıyl turǵyndar tarapynan 40 myńǵa jýyq ótinish kelip túsken. Jyl basynan beri ýchaskelik ınspektorlar 5 myńnan astam qylmystyq isti áshkerelep, almatylyqtardyń 370 myńnan astam aryz-shaǵymyn qanaǵattandyrǵan. Nátıjesinde, 61,6 myń azamat ákimshilik jaýapkershilikke tartylypty.
Búginde ýchaskelik polısııa qyzmetiniń materıaldyq-tehnıkalyq bazasyn nyǵaıtý, polısııa qyzmetkerleriniń mártebesin kóterý máselelerine aıryqsha mańyz berilip otyr. Shaharda bul baǵytta keshendi baǵdarlama qabyldaý jaıy da nazarǵa alynǵan.
ALMATY
