Memorıaldyń ashylý saltanatyna quqyq qorǵaý salasynyń ardagerleri men marqumnyń týystary qatysty. Qazaqstan polısııasynyń qalyptasýy men damýyna, qylmyspen kúreske jáne qoǵamdyq tártipti saqtaýǵa qomaqty úles qosqan Rústem Esimhanuly elimizdiń ár túkpirinde laýazymdy qyzmet atqaryp júrgen quqyq qorǵaý júıesiniń qanshama býynyn tárbıelep shyǵardy. Qurmetti eńbek demalysynda júrse de qoǵamdyq ómirge belsene aralasyp, tártip saqshylarynyń jańa býynyn patrıottyq rýhta tárbıeleý, urpaqtar sabaqtastyǵyn jalǵaý isine qajyr-qaıratyn arnady. Bul taqtaısha taǵylymdy tulǵanyń qaıratkerlik jolyn jas urpaqqa úlgi etý maqsatynda ornatyldy, deıdi jıylǵandar.
– Eńbek jolyn qarapaıym tergeýshiden bastaǵan ádilet general-maıory Ishki ister mınıstriniń birinshi orynbasaryna deıingi laýazymdy qyzmetterdi saty-satysymen alǵaýsyz atqardy. General bolý ár soldattyń armany bolǵanymen, myńnyń biriniń ǵana mańdaıyna buıyratyn baq. Rústem Qaıdarov negizin qalap, on toǵyz jyl boıy basqarǵan «Generaldar keńesi» qaýipsizdik salasyndaǵy barlyq qurylymdarǵa baǵyt silteıtin, aqyl-keńesin beretin jolbasshy ujym boldy desek qatelespeımiz. Atalǵan qoǵamdyq birlestik TMD elderi boıynsha tuńǵysh ret bizdiń elimizde qurylyp, tatýlyq tamyrynyń tereńge tamyr jaıýyna sep boldy. Túbi bir baýyrlas halyqtardy da yntymaq pen birlikke uıystyrdy. Elim dep ótken erdiń esimin tálimdi urpaq máńgi áldılep ótýge tıis, – deıdi Almaty qalasy ákimi apparatynyń basshysy Talǵat Sársenbaev.
2019 jyldyń aıaqtalýyna sanaýly kúnder qalǵanda Almatydan jetken aýyr habar kúlli qazaq jurtynyń qabyrǵasyn qaıystyryp ketken edi. Alataýdan arqa tósine bet alǵan alyp ushaq áýege kóterile bere tosyn apatqa ushyrap, on eki otandasymyz opat boldy. Tutas eldiń kóńiline tuman ornatyp, ulttyq aza tutý kúnin týyndatqan qaıǵyly jaǵdaıdan Qazaqstan «Generaldar-keńesiniń» tóraǵasy Rústem Qaıdarov kóz jumǵan bolatyn.
ALMATY
