BYLTYRǴY JYLǴA JOǴARY BAǴA

Astanada Boks federasııasynyń ótken jylǵy jumys qorytyndysy men 2012 jylǵa deıin sporttyń osy túrin damytý máselesin talqylaýǵa arnalǵan keńes ótti. Keńeste osy máselelerden bas­qa Qazaqstannyń ulttyq, jastar jáne áıelder quramasynyń aldaǵy jarystary týraly keńirek málimet berildi. Munda federasııanyń atqarýshy dırektory Danııar Ábilǵazın men halyqaralyq baı­lanystar jónindegi vıse-prezı­denti Janbolat Sársenov, ulttyq quramanyń bas bapkeri Myrzaǵalı Aıtjanov, memlekettik bapker Bolat Abdrahmanov pen elimizdiń ishki sporttyq sharalaryn ótkizý jáne Búkilálemdik boks serııasyna qatysýy jónindegi úılestirýshi Bolat Mankenov sóz sóılep, fede­rasııa jumysyna, onyń boksty damytýdaǵy aldaǵy maqsat-mindet­teri jóninde óz pikirlerin bildirdi. Keńeste sóz sóıleýshiler ótken jyldan bastap federasııa basshysy bolyp Tımýr Qulybaev kelgeli beri elimizdiń barlyq óńirlerinde sport­tyń osy túrin damytýdyń jańa joba-josparlary jasalyna bas­ta­ǵanyn, onyń ishinde oblystyq fe­de­rasııalardyń basshylyǵyna kásip­ker azamattardyń shaqyryl­ǵanyn, qazir olardyń qoldaý kór­setýimen boksshylar men bapker­lerdiń jalaqysy birneshe esege óskenin, al jattyǵý zaldary bolsa qazirgi zaman talaptaryna saı jabdyqtalyp jatqandyǵyn atap ótti. Sonymen birge olar búginde bylǵary qolǵap sheberlerine Al­maty oblysynyń “Aqbulaq” sport kesheninde, Almatynyń janyndaǵy Novoalekseev kenti men Aqmola oblysy, Shýche qala­syndaǵy “Jaq­sy” sport ordasynda jatty­ǵý­ǵa múmkindik jasalǵanyn, aldaǵy kezde dál osyndaı zaldar­dyń Astanada da salynatynyn atap aıtty. Keńeste kelesi qaralǵan bir másele, boksshylar men tóreshi­lerdiń ju­my­sy jaıynda boldy. Munda ult­tyq quramanyń bas bapkeri bap­kerler men tóreshi­lermen jumys isteýde federasııa­nyń vıse-prezı­dentteri Iýrıı Shaı men Serik Qonaqbaevtyń jumysyna rızashy­ly­ǵyn bildire­tinin jetkizdi. Onyń aıtýynsha, qazir bapkerler men tóreshilerdi yntalandyrý úshin olarǵa mate­rıaldyq qoldaý kórsetilýde. So­nyń nátıjesinde olar óz jumy­sy­na jaýapkershilik­pen qaraýda. Osy­ǵan baılanysty olardy shetelderde tájirıbe almasý, semınarlar men oqýlarǵa jiberý máselesi qaras­tyrylýda. Keńeste osydan keıin boksshy­lardy ǵylymı turǵydan daıyndaý máselesi qaraldy. Bul másele kópten beri aıtylyp júrgeni belgili. Degenmen, sońǵy kezderi ol másele qaıta qolǵa alynyp, tıisti deń­geıde sheshilýde. Máselen, federa­­sııanyń atqarýshy dırek­tory Danııar Ábilǵazınniń aıtýyn­sha, búginde boksshylardy jaqsy daıyndaý maqsatynda quramyna dárigerler, psıhologtar, fızıolog­tar men bıohımıkter kiretin ar­naıy top qurylyp otyr. Bul top­tyń mindeti – sportshylarǵa jeke kózqaraspen qarap, olardyń daıyn­dy­ǵyn árqashan nazarda ustaý. Kelesi qaral­ǵan másele, jastar, qyzdar jáne áıelder quramalary­nyń byltyrdan bergi nátıjelerin talqylap, olardy aldaǵy jarys­tarǵa daıyndaý ja­ıyn­da boldy. Osy másele boıyn­sha sóz alǵan mem­lekettik bapker Bolat Abdrah­manov qazir jastar men áıelder komanda­lary federa­sııa tarapynan barlyq qoldaýǵa ıe bolyp otyr­ǵandaryn, osy kúnderi áıelder qura­masy mamyr aıynda Astanada ótetin Azııa chempıona­tyna, al jas­tary­myz kelesi jyly elordada jalaýyn kóte­retin álem chempıona­tyna daıynda­lyp jat­qan­darynan habardar etti. Keńes sońynda osylardan basqa elimizde birneshe jarystardy ótkizý josparlanyp otyrǵany habar­landy. Onyń ishinde Azııa konfede­rasııasy boıynsha ótkiziletin 21 týrnırdiń 12-in Qazaqstanda uıymdastyrý­ máselesi bar. Sony­men birge jıyn­da osy jazda Astanada Prezıdent N.Á.Nazar­baev­tyń kýbogy jolyn­daǵy týrnır men Búkilálemdik boks serııasy boıynsha elimizdiń 12 komandasy qatysatyn jarysty ótkizý máselesi qaraldy. Bul báseke jóninde sóz alǵan Búkilálemdik boks serııasyna qatysýy jónindegi úılestirýshi Bolat Mankenov jekpe-jektiń árqaı­sysyn 3 mınótten 5 raýnd boıynsha ótkizý josparlanyp otyrǵanyn, onyń jeńimpazdary Olım­pıadaǵa joldama alýǵa múm­kindikteri bolatynyn atap aıtty. Dastan KENJALIN.