Aldyńǵy aqparatta habarlaǵanymyzdaı, Mádenıet jáne sport mınıstri Aqtoty Raıymqulova májilismender aldynda Qazaqstannyń keıbir zańnamalyq aktisine týrıstik qyzmet máselesi boıynsha ózgerister men tolyqtyrý engizý týraly zań jobasyn qorǵaǵan bolatyn.
Zań jobasy boıynsha Májilis tóraǵasy Nurlan Nyǵmatýllın pikir bildirdi.
"Zań jobasy boıynsha týroperatorlyq jumysty úsh túrge bólý – sizderge ne úshin kerek bolǵanyn ashyq aıtý kerek. Ol eń aldymen týrısterdi syrtqa shyǵaratyn týroperatorlardyń sanyn anyqtaý úshin kerek boldy. Solaı ǵoı!?" dep surady Nurlan Nyǵmatýlın mınıstrden Májilis otyrysynda.
Aqtoty Raıymqulova buǵan deıin shetelge shyǵatyn qazaqstandyq týrısterge qyzmet kórsetetin týroperatorlardyń keıde jabylyp qalyp, munyń qıynshylyǵyn qarapaıym týrıster kórgenin jetkizdi. Sondyqtan zań jobasy arqyly týroperatorlar arnaıy lısenzııalaýdan ótkizilip, syrtqy týrızm salasynda eńbek etetin týrfırmalar sanyn aıqyndaý kózdelgen. Májilis tóraǵasy mınıstrdiń bul usynysymen kelispeıtinin málim etti.
"Men bul rette "Atameken" palatasynyń pozısııasyn qoldaımyn. Syrtqy týrıst "Búrkit" júıesinen bastap Shekara qyzmetine deıin qanshama tekseristen ótedi. Bári de baqylanady. Týroperatorlardyń sanyn aıqyndaý sizderge bir maqsat úshin ǵana kerek boldy. Ol – týroperatorlardy "Týrıstik qamqor" qoryna jarna aýdartýǵa mindetteý. Bary osy! Mınıstr hanym, bıznesti qorǵaımyz deýdiń qajeti joq. "Atamekenniń" bul máseleni ýaqtyly kótergeni qandaı jaqsy bolǵan. Ádemi sózdiń artynda múlde basqa maqsat tur. Mynadaı joǵary minberde bıznesti qorǵaımyz dep urandap, týrıstik kompanııalarǵa kerisinshe qysym kórsetýge tyrysýdyń qajeti joq", dedi Nurlan Nyǵmatýllın.
