О́tken jyly oblys ákimi saıajaı turǵyndarymen kezdeskende, keıin jeke qabyldaý ótkizgen kezinde de turǵyndar osy saıajaılardaǵy eki kópirdiń eskirgenin aıtyp, másele kótergen edi. Sol máseleni jergilikti bılik birden qolǵa alyp, bıýdjetten 595 mln.teńge bólip, bıylǵy jyldyń mamyrynda kópir qurylysyn bastaǵan bolatyn. Karantındik sharalar kezinde de qurylys jumystary úzdiksiz júrgizilip, sonyń nátıjesinde qos kópir el ıgiligine berilip otyr.
Qýanyshty jańalyqpen turǵyndardy quttyqtaǵan oblys ákimi A.Batalov:
– Bul kópirler jergilikti turǵyndardyń alańsyz júrip-turýyna qolaıly bolady dep oılaımyn. Biz qalanyń ortalyǵyn ǵana emes, shetki aýmaqtaryn, sonyń ishinde saıajaılardy da kórkeıtý jumystaryna turaqty kóńil bólip kelemiz. Aýyz sý, elektr jaryǵy, jol jáne basqa da ınfraqurylymdar júrgizilip, halyqtyń turmysyna qajetti jaǵdaılar jasalýda. Jeltoqsandaǵy merekeler qarsańynda oblysta kóptegen jańa nysandar ashylady. Sonyń ishinde Taldyqorǵan qalasynda elimizdegi teńdesi joq jabyq júzý basseıni iske qosylady. Kóp balaly otbasylarǵa 200-den astam kottedj úıler beriledi. Osynyń bári turǵyndar úshin, jas urpaqtyń bolashaǵy úshin jasalyp jatyr, – dep, halyqtyń turmys sapasyn jaqsartý maqsatynda atqarylǵan birqatar isterdi atap ótti.
Sol sııaqty oblys basshysy mundaǵy burynǵy eski kópirdi buzbaı, qaıta syrtyn boıap, ótken kúnderdiń eskertkishi retinde qaldyrý kerektigin aıtty. Turǵyndar bul oıdy qyzý qýattady.
Almaty oblystyq ardagerler uıymynyń tóraǵasy Ermek Kelemseıit te sóz alyp, qalanyń shetinde, Qaratal ózeniniń arǵy betinde turatyn "Qyzyltas" pen "Shaıqorǵannyń" 7 jarym myń halqy úshin bul úlken qýanysh ekenin atap ótti. Kópirlerdiń qurylysyn sapaly oryndap, jumysty merziminde aıaqtaǵan "TeploRemStroı" qurylys kompanııasyna rızashylyǵyn bildirdi.
Munan soń eldi meken turǵyndarynyń atynan Álııa Bitebaeva kóptiń tilegin jetkizdi. "Amandyq Ǵabbasuly, ótken jyly aqpan aıynda saıajaı turǵyndarymen kezdesken kezińizde biz osy kópirlerdiń máselesin sheship berýdi suraǵan edik. Siz ýáde bergensiz. Sol aıtqan ýádeńizde turyp, mynandaı keremet kópir salyp berdińizder. Buryn selkildegen kópirden balalarymyz ótip bolǵansha janymyzdy shúberekke túıip turatynbyz. Qystyq kómir-otyn jetkizý biz úshin bir mashaqat edi, eski kópir oǵan jaramaıtyndyqtan, otyndy taýdaǵy qıyn joldarmen tasýǵa týra keletin. Endi onyń eshqaısysyna alańdamaıtyn boldyq. Bul eki kópir bizdi eki taraptan qoldap, qushaqtap turǵan eki qol sekildi. Biz osy kópirler arqyly sondaı janashyrlyqty sezindik", dedi 35 jyldan beri "Shaıqorǵanda" turyp kele jatqan Á. Bitebaeva.
Munan soń oblys basshysy A.Batalov "Qyzyltas" saıajaıyndaǵy kópirdi arnaıy baryp kórdi. Qos kópirdiń qurylysyn júrgizgen jumysshylarmen tildesip, rızashylyǵyn aıtty.
Qala marshrýtyndaǵy № 14 jáne № 3 avtobýstardyń sońǵy aıaldamasy endi burynǵydaı kópirge kelip tirlmeıdi, kópir arqyly saıajaılardyń ishine ótip, júretin baǵyty uzarady. Bul da – turǵyndar úshin qýanysh.
Qos kópirdiń qurylysyn júrgizgen "TeploRemStroı" qurylys kompanııasynyń dırektory Serik Qomshabaevtyń aıtýynsha, qurylys jobalyq-smetalyq qujatqa saı, sapaly oryndaldy. Ony salýǵa otandyq qurylys materıaldary qoldanylǵan. Kópirdi salý barysynda 70 shaqty adam jumys istegen, olardyń barlyǵy da – jergilikti turǵyndar. "Qyzyltas" jáne "Shaıqorǵan" saıajaılarynda jańadan salynǵan eki kópirdiń de uzyndyqtary – 69 m, júrý bóliginiń eni – 7 m.
Jalpy Taldyqorǵanda 12 saıajaı qaýymdastyǵy bar. Jergilikti bıýdjet esebinen olardy aýyz sýmen qamtý, saıajaılarǵa elektr, sý, gaz jelilerin tartý, jol jóndeý jumystary atqarylýda.
Máselen, 2014 jyldan bastap jalpy somasy 553 mln. teńgeden astam somaǵa 107 km elektrmen qamtý jelilerine rekonstrýksııa jasalǵan, sol qatarda "Shaıqorǵan" men "Qyzyltas" saıajaılary da bar.
Jyldar boıy qordalanyp qalǵan aýyz sý máselesi de sheshimin tapty. Qazirgi kezde "Merekelik", "Shaıqorǵan", "Úıtas", "Dostyq", "Agropromyshlennık", "Saryarqa" saıajaılaryn ortalyqtandyrylǵan sý júıesimen qamtý úshin 62 shaqyrymnan astam jeli tóseldi. Bul jumys áli de jalǵasýda.
Saıajaı qaýymdastyqtaryna tabıǵı gaz jetkizildi. Búginde "Shaıqorǵan", "Úıtas", "Saryarqa", "Dostyq", "Klıýchı", "Agropromyshlennık" saıajaılary turǵyndarynyń kógildir otynǵa qosylýǵa múmkindikteri bar.
