Biz sóz etip otyrǵan bilim uıasyndaǵy daryndy oqýshylardyń bastamasymen jýyrda «Sóz tórkini» dep atalǵan pikirsaıys klýby óz jumysyn bastady. Qazaq tili men ádebıetiniń máıegine úńilýdi maqsat tutqan talapkerlerdiń alǵashqy qadamy jaman emes. Belsendi shákirtterdi sóz ónerine, oı erkindigine mashyqtandyratyn joba quramyna 20 oqýshy enipti. Munda jas zııatkerler ózderin til sheberligine baýlyp júr.
– Bul bastamany shákirtterimizdiń usynysymen júzege asyryp otyrmyz. Oqýshylardyń kópshilik aldynda ashyq sáıleý jáne synı turǵyda oılaý sheberligin arttyrýdyń mańyzy zor. Qazirgi ýaqytta zoom platformasyn paıdalana otyryp, alǵashqy jumysymyzdy bastap kettik. Pikirsaıys klýbynyń árbir basqosýynda túrli salada jetistikke jetken mamandarmen suhbattasyp, erkin áńgime órbitemiz. Kóbine-kóp aqyn-jazýshylar, jýrnalıster men mádenıet salasy mamandarymen bolǵan dıdarlasýlar klýb múshelerine aıryqsha áserin tıgizip júr. «Bolmasań da uqsap baq» degendeı, olardy kórgen balalar ádebı kitaptar oqyp, sheshendik sózder jattap, qanattanady. Oıyn ashyq aıta alatyn, sóz saptaý qabileti qalyptasqan urpaq qoǵamnan ornyn taýyp, bolashaqta óz salasynyń kóshbasshysy bolýǵa daǵdylanady, – deıdi Cúıinbaı Aronuly atyndaǵy №143 mektep-lıseıiniń aǵa tálimgeri Nazerke Júnisbaeva.
Pikirsaıys klýbynyń kóshbasshysy 10-synypta oqıtyn Ashat Tólepbergen. «Qaı salanyń shetinde júrse de, árbir qazaq balasy óz ana tilin, ádebıeti men tarıhyn tereń bilýi kerek» degen ol bolashaqta jýrnalıst bolýdy armandaıtynyn aıtady. Ashattyń sózinshe, «Sóz tórkini» uıymynyń músheleri elimiz ben álemde bolyp jatqan eleýli jańalyqtardy da ózara talqyǵa salyp, oı-pikir bildirip otyrady. Aldaǵy ýaqytta top músheleri tolyǵa túspek.
