Eshten de kesh jaqsy degendeı, byltyr shilde aıynda Oral áýejaıyn qalpyna keltirý jumystary bastalǵan kezde batysqazaqstandyq áýe kóliginiń janashyrlary «e, base!» dep bir serpilip qalǵan edi. Bul isti qolǵa alǵandar áýejaı ǵımaratynyń negizgi qańqasy men irgetasyn qaldyryp, jańǵyrtý jumystaryn júrgizýdi jón kóripti. Endigi kezekte joba qalaı jalǵasyn tabar eken dep júrgende onyń búgingi geodezııalyq talaptar men normatıvterge múldem sáıkes kelmeıtini anyqtaldy. Bastapqy jumystarǵa tıisti tekserýler júrgizgen arnaıy mamandandyrylǵan kásip­oryn­nyń sarapshy mamandary osyn­daı qorytyndyǵa keldi. Soǵan sáıkes buǵan deıingi qal­pyna keltirý jumystary shuǵyl toqtatylady. Sóz joq, osyn­daı ústirt jumystyń, salaqtyq­tyń sal­darynan biraz qarajat zaıa ketip, jelge ushqanyna shek keltirý qıyn-aq.

Sóıtip, bıylǵy 2020 jyl­dyń basynda áýejaı quryly­sy­na qaıtadan tapsyrys berý­ge týra keldi. Munda eń aldy­­men ishki logıstıkalyq júıe­lerdi je­til­dirýge basa nazar aýda­ryl­ǵanyn aıtty Batys Qazaqstan ob­ly­synyń ákimi Ǵalı Esqalıev Prezıdent janyndaǵy Ortalyq kom­mýnıkasııalar qyzmeti ala­ńynda ótken brıfıngte BAQ ókil­deri saýalyna oraı qaıtarǵan jaýa­bynda. Oblys basshysynyń aı­týynsha jańa joba boıynsha qol­ǵa alynǵan jolaýshylardyń ushaq salonyna deıin jetýine múm­kin­dik beretin teletrap qaıta­dan tapsyrys berilgen jobanyń basty artyqshylyǵy bolmaq.

Sonymen birge keıingi joba­nyń 3000 sharshy metrge de­ıin keńeıtilip jasalǵany da ony halyqaralyq áýejaıǵa qoıy­la­tyn standarttar men krıterıılerge birtaban jaqyndata túsedi. Munda dızaın tóńiregin­degi máseleler de muqııat oılas­tyrylǵany áýejaıdyń jańa keıipke enetinine kepildik bere alady deýge bolady.

Qazirgi kúni búgingi áńgime ar­qaýyna aınalyp otyrǵan Oral áýe­jaıyn jasaqtaý jónindegi jańa jobaǵa tapsyrys berýshi Batys Qazaqstan oblystyq ákim­digi tarapynan memlekettik sarap­tamaǵa jiberilgen. Jergilikti atqarý organdary jetekshileriniń málimdeýine súıensek, ony qup­taǵan jaýap jyl aıaǵyna deıin keledi dep kútilýde.

Eger osy boljam naqty shyn­dyq­qa aınalsa áýejaı qurylysyn al­daǵy 2021 jyldyń basynda bas­­tap ketýge tolyq negiz bar dep tu­jy­rym jasaýdyń jóni bar. Qal­pyna keltirý jumystary bel­­gi­­lengen ýaqytta bastalǵan jaǵ­­­daı­da ony 2021 jyldyń jel­toq­san aıyna deıin aıaqtaý kózdel­gen. Al ázirge onyń týmaǵan tý sıyr­dyń sary ýyzyna uqsap tur­ǵa­ny­men eriksiz kelisýge týra keledi.

Al búgingi kezde Oraldan ishki reıster boıynsha ushatyn jolaý­­shylarǵa ýaqytsha termınaldar­da qyzmet kórsetý joldary qaras­tyrylǵan. Buǵan qosa jolaýshylardy qarsy alýshylar men shy­ǵaryp salýshylar úshin arnaıy vagon­dar qoıylǵan.

Premer-Mınıstrdiń orynbasary Roman Sklıar Batys Qazaq­stan oblysyna jasaǵan ju­mys saparynda aldaǵy ýaqytta qol­ǵa alynatyn jobanyń jaı-kúıi­ne kóńil aýdarǵanyn da aıta ket­keni­miz jón. Vıse-premerge jer­gilikti bılik ókilderi tarapynan tómendegideı derekter berildi. Quny 6,8 mlrd teńgeni quraıtyn qazirgi jobany «KPO bv» kompanııasy qarjylandyratyny jáne jańǵyrtý jumystary nátı­jesinde termınaldyń aýmaǵy 4,5 ten 6,5 myń sharshy metrge deıin ulǵaıatyny aıtyldy. Buǵan qosa bir saǵatta ótetin jolaýshylar sany 200-den 400-ge deıin artpaq. Sóz joq, munyń bári jón áńgime. Áıtse de osy tusta kóńil­di kúpti qylyp júrgen taǵy bir basty másele jóninde oı-pikir qozǵaýdyń reti kelip tur. Bul áńgime Oral áýejaıynyń halyqaralyq dep aıtylyp júr­gen ataýynan týyndaıdy. Árıne ony bulaısha asqaqtata aıtýdyń eshqandaı aıyby joq, tek árbir sóz óziniń aty men zatyna sáıkes kelgeni jón emes pe? Aıtalyq sońǵy jyldary Oral áýejaıynan alys shetelderdi bylaı qoıǵan­da, taıaý shetelderge, ıaǵnı TMD aýmaǵyndaǵy qalalarǵa, sonyń ishinde irgedegi Reseıdiń astanasy Máskeýge birde-bir reıs ushpaǵan bolsa, ony halyqaralyq dep damytýdyń qandaı qajeti bar?

Osy oraıda halyqaralyq dep atalatyn Aqtaý jáne Aqtóbe áýeja­ıynda bolǵanymyzda mun­da syrtqy reısterdiń sonshama kóp­tigine ári jıiligine tań-tamasha qalǵanymyz bar. Son­daı-aq osy óńirlerdegi basshylar Air Astana ulttyq áýe­kom­­panııasymen ózara kelisim-shart ja­sasyp, ushaqpen ushqysy kele­­tin óńirdiń qarapaıym tur­ǵyndaryna qoljetimdi baǵamen bılet usynyp otyrǵany da jyly áser qaldyrǵan edi.

Osyndaı úrdis pen tájirıbeni Batys Qazaqstan oblysyndaǵy atqarýy organ jetekshileri de iske asyratyn bolsa, bul jaǵymdy jáıt óńir turǵyndary úshin jasal­ǵan áleýmettik-turmystyq turǵy­daǵy qoldaýdyń taǵy bir tut­qasy bolyp shaǵar ma edi degen oı keledi. Qalaı degende de aldaǵy ýaqytta Oral áýeja­ıy qurylysy boı kótergen kezde onyń halyqaralyq dep atal­ǵan ataýy men mártebesi saq­ta­lyp qala beretini anyq. En­deshe joǵaryda aıtylǵandaı onyń soǵan sáıkes is-qımyl tanyt­qanyna ne jetsin? Bul máseleni retteýdiń basty joly elimizdiń batystaǵy qaqpasy ispettes Oral áýejaıynan halyqaralyq mańyzy bar jańa reıster ashý ekeni talas týǵyzbaıtyn másele.

ORAL