Naqty aıtqanda, qazirgi jaǵdaıda bar senim men jaýapkershilik atalǵan top jetekshileri men múshelerine júktelgen. Osy oraıda sońǵy eki aıda Oral óńirinde KVI-diń aldyn alý maqsatynda 242 monıtorıngtik sıpattaǵy reıdter ótkizilip, sanıtarlyq-epıdemııalyq talaptardyń buzylýyna jol bergen birqatar nysan ıeleri ákimshilik jaýapkershilikke tartylypty. Bul – árıne qoldaýǵa turarlyq másele.
Áıtse de osyndaı synı sátterde monıtorıngtik top músheleri tarazy basyn teń ustamaı, qazaqy uǵymǵa salǵanda «ala qoıdy bóle qyrqýǵa» jol bergeni Batys Qazaqstan oblysynda ótkizilgen indetke qarsy kúres jónindegi shtab otyrysynda aıtylyp, atalǵan jaıt jóninde oblystyq «Oral óńiri» gazetinde «Monıtorıngtik top jumysyna narazylyq bar» degen taqyrypta kólemdi materıal jarııalandy. Osy eseptik maqalada gazet tilshisi Batys Qazaqstan oblysynyń ákimi Ǵalı Esqalıev monıtorıngtik top jumysyna narazylyq bildirýshiler bar dep málimdegenin alǵa tartypty. Oblys basshysy mundaı toqtamǵa monıtorıngtik toptardyń qyzmetine qatysty áleýmettik jeliden túsken habarlamany oqyp, tanysqannan keıin kelgen eken.
Gáp mynada deýge bolady. Birqatar monıtorıngtik toptyń músheleri toı ótkizýge kelisim berip, jaǵdaı jasaǵan keıbir meıramhana ıelerin búrkemelep, kerisinshe ekinshi bir jaǵdaıda ótip jatqan basqosýdy toqtattyryp, aıyppul saldyratyn kórinedi. Sóz joq, mundaı kezge tekseriske birinshi tap bolǵan toıhana qojaıyndarynyń oryndy ókpe-renishi men narazylyǵy týyndaıdy emes pe?
Shtab otyrysynda monıtorıngtik toptyń ústinen ádiletsizdikke jáne ala qoıdy bólek qyrqýǵa jol bergeni jónindegi habarlama dáleldense, onyń músheleri, sonyń ishinde memlekettik qyzmetkerler jumysynan bosaıtyny jóninde uıǵarym jasalǵan.
ORAL
