Mańǵystaý oblystyq densaýlyq saqtaý basqarmasynyń baspasóz qyzmetiniń habarlaýynsha, búginde Aqtaý qalasy boıynsha barlyǵy 7 emhana bar, onyń ishinde ekeýi memlekettik bolsa, qalǵany – jekemenshik. Buryn turǵyndar qalanyń shet jaǵyndaǵy oblystyq stomatologııalyq ortalyqqa tis dárigerine baratyn bolsa, endi tis dárigeriniń qyzmeti №2 emhanada da qoljetimdi bolmaq.
Emhananyń ekinshi qabatynda ornalasqan stomatologııalyq kabınet kreslomen jabdyqtalǵan jáne arnaıy stomatologııalyq qondyrǵysy bar. Naýqastarǵa tegin medısınalyq kómektiń kepildendirilgen kólemi jáne mindetti áleýmettik medısınalyq saqtandyrý aıasynda, ıaǵnı eki paket negizinde sapaly kómek alýyna bolady. Naýqastardy tis dárigeri jáne medbıke qabyldaıdy, olar kez kelgen jedel kómek kórsete alady. Atalǵan emhanada stomatolog kabınetiniń ashylǵanyna kóp ýaqyt óte qoımasa da pasıentter sanynyń artýy baıqalady.
Kabınetke tis dárigeri retinde jumysqa joǵary sanatty dáriger Shámil Nadır shaqyryldy. Ol aldymen 2002 jyly Aqtaý «Meıirbıke» medısınalyq kolledjin «Tis tehnıgi» mamandyǵy boıynsha bitirip, 2007 jyly Marat Ospanov atyndaǵy Batys Qazaqstan medısınalyq ýnıversıtetinde joǵary bilim alǵan. Eńbek jolyn Qaraqııa aýdandyq emhanasynda tis dárigeri retinde bastaǵan Shámil 12 jyldan beri tisi aýyrǵandardyń janynan tabylyp keledi. Emdelýshilerdiń yqylas-senimi de tómen emes, tisi aýyrǵanda aldyna qınalyp kelgender, kóp uzamaı alǵysyn aıtyp kúlip ketip jatady.
– Biz ǵana emes, naýqastar da sapaly medısınalyq kómektiń qoljetimdiligin jaqsartý úshin Aqtaý qalalyq №2 emhanasynyń bazasynda stomatologııalyq kabınettiń óz jumysyn bastaǵanyna qýanyp jatqanyn aıtady. Biz óz aldymyzǵa eń aldymen sapaly qyzmet kórsetýdi mindet etip qoıdyq. Oblystyń densaýlyq saqtaý basqarmasy tarapynan qoldaý bar, jumys isteý úshin barlyq jaǵdaı jasalǵan, – deıdi Sh.Nadır.
Kúnine 30-ǵa jýyq adam tis dárigerine kelip, sapaly qyzmet alýyna bolady. Naýqastarǵa tis aýrýynyń dıagnozy qoıylyp, bireýler tisin juldyrsa, endi bireýler medısınalyq tekserýden ótip jatady. Kabınette tegin stomatologııalyq kómek 18 jasqa deıingilerge, júkti áıelderge jáne halyqtyń áleýmettik osal toptaryna kórsetiledi. Emhanada mamandar árbir adam tis jáne parodont aýrýlarynyń aldyn alý úshin jylyna 2 ret tis dárigeriniń qaraýynan ótýi tıis ekenin aıtady. Sondaı-aq shuǵyl stomatologııalyq kómek memleket esebinen tegin medısınalyq kómektiń kepildendirilgen kólemi sheńberinde kórsetiledi. Ekinshi dúnıjúzilik soǵys qatysýshylary, I, II, III toptaǵy múgedekter, «Altyn alqa», «Kúmis alqa» medalimen marapattalǵan kópbalaly analar, ataýly áleýmettik kómek alýshylar, jasy boıynsha zeınetkerler, ınfeksııalyq, áleýmettik máni bar aýrýlarmen jáne aınalasyndaǵylarǵa qaýip tóndiretin aýrýlarmen aýyratyn naýqastarǵa tegin kómek alýyna kedergi joq.
О́zderine júktelgen zańdy talaptar men mindetterdi basshylyqqa alǵan kabınet tisi aýyrǵandardyń tikeleı kelip, mazalaǵan tisti «tártipke salatyn» ornyna aınalýda.
Mańǵystaý oblysy
