Qazaqstan delegasııasyn Premer-mınıstrdiń orynbasary – Mádenıet jáne aqparat mınıstri Aıda Balaeva bastap bardy. Mádenıet kúnderi aıasynda Vıse-premer Qatar Memleketiniń Mádenıet mınıstri sheıh Ábdirahman ben Hamad ben Djasım Ál Tánımen ekijaqty kezdesý ótkizdi.
Kelissózder barysynda taraptar mádenıet pen óner salasyndaǵy ekijaqty yntymaqtastyqty keńeıtý keleshegin talqylap, birlesken jobalardy júzege asyrýǵa qyzyǵýshylyq bildirdi.
«Qazaqstan Respýblıkasynyń Mádenıet kúnderiniń Qatar Memleketinde ótýi biz úshin zor mártebe. Qazaqstan men Qatar halyqtaryn jaqyndastyratyn ortaq tarıhı jáne rýhanı qundylyqtar bar. Eki el de baı kóshpeli órkenıet murasyn saqtap, dástúrli mádenıetti qadirleýge aıryqsha mán beredi. Osy ortaq qundylyqtar aldaǵy ýaqytta da halyqtarymyzdy odan ári jaqyndastyryp, jańa birlesken mádenı jobalardy iske asyrýǵa berik negiz bolady dep senemin», dedi Aıda Balaeva.
О́z kezeginde Qatar Memleketiniń Mádenıet mınıstri sheıh Ábdirahman ben Hamad ben Djasım Ál Tánı eki el qarym-qatynastarynyń damý áleýeti joǵary ekenin atap ótip, birlesken mádenı jobalar yntymaqtastyqty odan ári keńeıtýdiń berik negizine aınalatynyna senim bildirdi.
Kezdesý barysynda kreatıvti sektordaǵy ózara yqpaldastyqqa erekshe nazar aýdaryldy. Aıda Balaeva Qatar Memleketinde kreatıvti ındýstrııalardyń qarqyndy damyp kele jatqanyn, elimizde de bul baǵyttyń basymdyqqa ıe ekenin atap ótti. Respýblıkada Kreatıvti ındýstrııalardy damytý qory qurylǵan. Osyǵan baılanysty bizdiń tarap birlesken jobalardy júzege asyrýǵa jáne atalǵan salada praktıkalyq yntymaqtastyqty keńeıtýge daıyn ekenin jetkizdi.
Sonymen qatar ózara yqpaldastyqtyń ózge de keleshegi zor baǵyttary aıqyndaldy. Atap aıtqanda, birlesken kitaptar shyǵarý, eki el avtorlarynyń shyǵarmalaryn qazaq jáne arab tilderine aýdarý, sondaı-aq
sýretshilerdi qoldaý tetikteri boıynsha tájirıbe almasý máseleleri talqylandy.
Praktıkalyq qadam retinde atalǵan baǵyttardyń barlyǵyn qamtıtyn Vedomstvoaralyq is-sharalar josparyna qol qoıý usynyldy.
Kezdesý sońynda delegasııa basshylary elimizdiń óner sheberleriniń merekelik gala-konsertin tamashalady. Konsert baǵdarlamasynda qazaq halqynyń klassıkalyq muralarynan bastap, halyq kúıleri men ánderi, sımfonııalyq óńdeýdegi zamanaýı týyndylar, sondaı-aq arab ánderi oryndaldy.
Sondaı-aq delegasııa basshylary Mádenıet kúnderiniń negizgi is-sharalary ótip jatqan Doha qalasyndaǵy «Darb ál-Saǵı» mádenı-tarıhı ortalyǵyna bardy. Munda taqyryptyq konsertter, sándik-qoldanbaly óner kórmeleri, ulttyq naqyshty zamanaýı úlgide tanytatyn dızaınerlerdiń týyndylary usynylǵan.
Baǵdarlamada elimizdiń Ulttyq mýzeıi daıyndaǵan ekspozısııaǵa erekshe oryn berildi. Sonymen qatar ulttyq dástúrler men sport túrlerin keńinen nasıhattaýǵa aıryqsha mán berilip, onyń ishinde dástúrli sadaq atý óneri, saıatshylyq, sondaı-aq tazy ıtpen ań aýlaý túrleri tanystyryldy.
Aıta keteıik, elimizdiń mádenıet kúnderiniń tórt kúndik baǵdarlamasy Qazaqstan – Qatar mádenı-
gýmanıtarlyq yntymaqtastyǵyn odan ári nyǵaıtýǵa jáne eldiń ulttyq mádenıetin halyqaralyq deńgeıde keńinen tanytýǵa baǵyttalǵan. Sondaı-aq aldaǵy ýaqytta bizdiń elde Qatar Memleketiniń mádenıet kúnderi ótedi.
