Birinshi oryn Elena Rybakınaǵa buıyrdy. Oǵan eshkimniń daý aıta almasy anyq. Kúni keshe ǵana ol Melbýrnde ótken Aýstralııanyń ashyq birinshiliginde top jaryp, «Úlken dýlyǵa» sanatyndaǵy týrnırlerdegi ekinshi tıtýlyna qol jetkizdi. Jarys barysynda Rybakına álemniń birinshi jáne ekinshi raketkalary Arına Sobolenko men Iga Shventekke shań qaptyrdy. Bir keremeti, jerlesimiz jeti kezdesýdiń altaýyn eki sette aıaqtady.
Dál sol týrnırdiń fınalyna jetken Anna Danılına ekinshi oryndy enshiledi. Ol serbııalyq Aleksandra Krýnıchmen juptasyp óner kórsetti. Danılına men Krýnıch tek belgııalyq Elıse Mertens pen qytaılyq Chjan Shýaıdan aılasyn asyra almady.
Úshinshi jáne tórtinshi satyǵa karateshiler Bella Samasheva men Sofıa Berýlseva jaıǵasty. Qos sportshymyz Túrkııanyń Ystanbulynda jalaýy jelbiregen Premer-lıgada altynnan alqa taqty.
Besinshi oryndy Zańǵar Nurlanuly enshiledi. Qazaqtyń asa daryndy tennısshisi jastar arasyndaǵy Australian open dodasynyń jartylaı fınalynda kúsh synasty. Altynshy satyǵa Temirlan Anarbekov turaqtady. Almatynyń «Qaıraty» ÝEFA Chempıondar lıgasynyń jalpy kezeńinde sońǵy orynda qalyp qoısa da, qazaq kıperiniń oıyny kópshiliktiń kóńilinen shyqty. О́ziniń asqan sheberliginiń arqasynda Temirlan atalǵan jarystyń eń úzdik qaqpashylarynyń tiziminde úzdik úshtiktiń qatarynan kórindi.
