«Bıttal» tuqymdy bir eshkiniń ózi táýligine 25 lıtr sút beredi eken. Bul eshkiniń quny 600 myń teńge shamasynda turady. Sol sııaqty «Zannın» eshkisinen de táýligine 5 lıtr sút alýǵa bolady. Atalǵan eshki sútiniń bir lıtri – 400 teńge. Sonymen qatar kásipkerdiń qorasynda Ispanııadan ákelingen asyltuqymdy eshkiler de bar eken. Bul eshkiler 370 myń teńgege baǵalanady.
«Mal azyǵyna ketetin shyǵyn kóp emes. Máselen, 60 eshkiniń alty aı qystan shyǵýy úshin 500 túk jońyshqa, 3 tonna bıdaı kerek. Jylyna 3-4 ret tóldeıtin «Romanskıı», aýǵanstandyq «Vagır» tuqymdy qoılardy da ósirýdemiz. «Vagır» tuqymdy eki aılyq qozy 200 myń teńge turady. Eger baǵýy jaqsy bolsa, bul qoıdyń eti 145 kılogramm tartady», deıdi kásipker.
Kásipker ótken jyly «Atameken» kásipkerlik palatasynan 4 mln teńge nesıe alyp, ol aqshaǵa 20 bas asyl tuqymdy eshki satyp alypty. Tynymsyz eńbeginiń nátıjesinde ony bıyl 60 basqa jetkizipti. Ol endi 6 paıyzben alǵan nesıesin 5 jyldyń ishinde qaıtarady. Kenjebek endi ózge áriptesterimen birge asyltuqymdy eshkige de sýbsıdııa tólense degen máseleni kóterýde. О́ziniń aıtýynsha, kásipker Almaty jáne Taraz qalalaryndaǵy joǵary oqý oryndarynda biraz ýaqyt stýdentterge sabaq bergen. Tipti Nur-Sultan qalasynda laýazymdy qyzmet te atqarǵan. «Alaıda aıaqastynan aýyryp, ınsýlt alyp qaldym. Sodan eshkiniń sútin iship emdelip, táýir bolǵan soń osy kásipke bet burdym», deıdi.
Búginde el ishinde eshki sútine degen suranys joǵary eken. Ol ónimdi satýdan bólek, karantın kezinde de ınternet arqyly eshki sútinen ne jasaýǵa bolatynyn zerdelegen. Sóıtip úsh aı boıy onlaın semınarǵa qatysyp, eshki sútinen sabyn jasaýdyń ádisin úırenipti. Áýeli balalardyń qyzyǵýshylyǵyn týdyrý úshin salmaǵy 80 gramm bolatyn balalar sabynyn oıynshyqqa uqsatyp ázirlegen. Qazir kásipker eshki sútinen sabyn jasap satýda. Úlkenderge arnalǵan sabyn 700, al balalarǵa arnalǵan sabyn 500 teńgeden baǵalanýda.
«Eshki sútiniń ózi – em. Al men oǵan neshe túrli paıdaly qospa maılardy qosamyn. Bul sabyndy qolyna jaqqan adam 4-5 mınýttan soń ǵana jýý qajet. Bet jarylǵanda jaqsa, birden áser etedi. Esh hımııalyq qospasy joq. Taza tabıǵı ónim. Osylaısha eshki sútinen sabyn jasaýǵa qol jetkizip otyrmyz», deıdi K.Seıdahmetov.
Sharýa eger asyltuqymdy eshkilerge de memleket tarapynan sýbsıdııa berilse, eshki ósirýmen aınalysqysy keletin jastardy tárbıeleıtinin aıtady. Bul rette T.Rysqulov aýdandyq aýyl sharýashylyǵy bóliminiń basshysy Erǵazy Espenovke habarlasqanymyzda, ol bólimnen sýbsıdııa berilmeıtinin, tek portal arqyly ǵana alatynyn jetkizdi.
Jambyl oblysy
