Ауылдағы сүт зауыты Алматыны өніммен қамтып отыр

Қоғам • 25 Қараша, 2020

Ауылдағы сүт зауыты Алматыны өніммен қамтып отыр

47 рет көрсетілді

Агроөнеркәсіп кешенінің аяққа тұруына сүт өндірісі де өзіндік үлес қосып отыр. Жалпы, осы сүт өндірісінің дамуы нарыққа дайын өнім шығарудан бөлек, мал шаруашылығының өркендеуіне де серпін беретіні анық. Бұған қоса сүт зауыттары отандық өндірістегі жұмыс үдерісінің үдеуі мен адамдардың еңбекпен қамтылуына да оң әсерін тигізетіні сөзсіз. Демек, аймақтардағы сүт өндірісінің болашағы айқын, деп хабарлайды Egemen.kz.

Қалмаханбет МҰҚАМЕТҚАЛИ

Сүт дайындау ісіне орасан үлес қосып отырған өңірдің бірі – Алматы облысы. Қазір Жетісуда 82 тауарлы сүт фермасы жұмыс істеп тұр. Мұнда 25,7 мың бас сауын сиыр бар. Биылғы 6 айда ғана 6 ферма іске қосылып, Қаратал, Іле, Еңбекшіқазақ және Панфилов аудандарындағы сүтті сиырдың саны 2 400 басқа көбейген. Ал жылдың соңына дейін тағы 6 сүт фермасы ашылып, мұндағы сауын сиырдың саны 2 000 басқа жетпекші.

Жалпы, өткен сегіз айда облыста 547,5 мың тонна таза сүт өндіріген болса, оның 89 мың тоннасы жоғарыда айтқан тауарлы-сүт фермаларының дайындаған өнімі екен. Бұл көрсеткіш былтырғымен салыстырғанда өскен. 2019 жылы аймақ бойынша 788,2 мың тонна сүт сауылса, фермалардың жылдық үлесі 87,2 мың тонна болыпты. Бұйырса, биыл жетісулық сауыншылар 816,7 мың тонна ағарған дайындауды жоспарлаған. Ал мұндағы сауын фермаларының үлесі 92 мың тонна болмақ.

Айтпақшы, сүт өнімдерін дайындауда алыс аудандарда орналасқан шағын өндірістердің қарқын алу қуантады. Мәселен, Сарқан ауданындағы "Ақбұлақ-Продукт" сүт зауыты қазір нарыққа 15 түрлі өнім шығарып отыр екен. 2008 жылы қайта жаңғыртылып, екінші тынысын ашқан өндіріс тәулігіне 80 тоннадан астам сүт өңдеуге қауқарлы. Зауыттың пастерленген табиғи сүтіне, шалап, құрт, сары май, қаймақ, айран мен ірімшік сияқты өнімдеріне сұраныс жоғары.

"Бұл іске 2008 жылы ден қойдық. Әуелі зауытты заманға сай жабдықтауды ойлап, жаңа құрал-жабдықтар сатып алдық. Алғашында сүттен 3 түрлі өнім шығардық. Қазір оның саны он бестен асты. Әрине, мемлекет қолдауын сезініп отырмыз. Биыл зауыт өндірген табиғи сүтке, сары майға және қатты ірімшікке 80 млн теңге субсидия алдық. Нәтижесінде, зауыттың өндірісін көлемін арттыруға қол жеткіздік. Жақында 17 млн теңге тұратын компрессор сатып алдық. Енді өндіріс көлемін ұлғайтып, жаңа өнім түрін шығаруды жоспарлап отырмыз", дейді "Ақбұлақ-Продукт" сүт зауытының директоры Бауыржан Қалимолданов.

Қазір зауыт өз өнімдерімен Сарқан ауданын толықтай қамтып, көрші аудандардың да сұранысын өтеуге көшкен. Ал Алматы қаласының тұрғындары бұл зауыттың тұрақты тұтынушылары деуге болады. Енді аудандағы зауыт тұтыну нарығына пастерленген табиғи сүті, шалап, құрт, сары май, қаймақ, айран, қатты ірімшіктен бөлек тәтті йогурт пен Голланд ірімшігін де шығармақ. Бұған негіз бар, дайындық та жеткілікті. Сұраныстың артатына да сенім мол.

Жалпы, "Ақбұлақ-Продукт" сүт зауытының өнімінде жасанды құрғақ қоспа жоқ, шикізат көзі табиғи сүттен алынады екен. Қазір қажетті сүтті ауыл-аймақтың тұрғындарынан сатып алуда. Биыл басшылық зауытқа қарасты шаруашылықтың іргесін кеңейтіп, асыл тұқымды сауын сиыр асырауға бет бұрған. Яғни, Сарқан ауданында тағы бір тауарлы-сүт фермасы салынатын болады. Бұл жаңа жұмыс орынының ашылуына жол ашпақ. Ал бүгінде зауытта 67 адам тұрақты еңбекпен қамтылған. Орташа жалақы 100 000 теңге екен. Зауыт басшылығы озық технологияны меңгерген жас мандарды жұмысқа тартуды дәстүрге айналдырыпты. Биыл аудандағы зауытқа 12 жас маман келген. Демек, ел ішіндегі өндірістің адымы ұзарып, өнім көлемі арта түсетініне сенім мол.

Күннің маңызды және өзекті жаңалықтарын «Егемен Қазақстан» телеграм каналынан оқыңыз