Zamanaýı talaptarǵa saı salynǵan Stýdentter úıiniń ár bólmesinde sanıtarlyq torap, jýynatyn bólme bar. Bir bólimde eki jatyn bólme bar. Árqaısysynda 4 adam ornalasady. Sonymen qatar, gaz plıta, tońazytqysh, as úı ústelimen jabdyqtalǵan tamaq daıyndaýǵa arnalǵan arnaıy bólme bar. Sonymen qatar, medısınalyq qyzmet kórsetý, teledıdar kórý, kir jýý, útikteý bólmeleri bar.
"Jataqhana qurylysynyń negizgi maqsaty – basqa qalalar men aýdandardan kelgen stýdentterdiń turýy úshin áleýmettik-turmystyq jaǵdaılar jasaý. Men bul jobany 2018 jyly Qyzylorda oblysy Kásipkerler Palatasynyń qoldaýymen bastadym. Úlken ashanadan basqa jataqhananyń ár qabatynda shaǵyn ashana bólmeleri bar. Sondaı-aq stýdentter ózderiniń bos ýaqytyn tómengi qabatta ornalasqan sport jáne trenajer zalynda ótkizýge múmkindigi bar", — dedi Saǵı Cúıenish.
Jataqhana wi-fi-men qamtamasyz etilgen, kovorkıng - ortalyq, kitaphana, ınternet-ortalyq jumys isteıtin bolady.
"Stýdentter úıi 5 qabatty ǵımaratta ornalasqan. 3 qabat jataqhana maqsatynda, 2 qabat kommersııalyq maqsatta qoldanylady. Atalǵan aýmaqta ashana, fıtnes, trenajer zaly, monsha, shashtaraz jáne keńselerge arnalǵan alańdar ornalasqan", — dedi kásipker.
Kásipker shyǵyndardyń bir bóligin memlekettik-jekeshelik áriptestik sheńberinde óteı alady. Ol úshin 2019 jyly memlekettik-jeke menshik áriptestik ortalyǵymen shart jasasty.
Eske salaıyq, «Qarapaıym zattar ekonomıkasy» baǵdarlamasy aıasynda oblys boıynsha jalpy somasy 16,5 mlrd.teńge quraıtyn 160 joba bar. Onyń ishinde: 110 jobany (9,0 mlrd teńge) bankter men Agrarlyq-kredıttik korporasııa maquldady. 10 joba (5,6 mlrd teńge) – qarjy ınstıtýttarynyń qaraýynda. Qalǵandary boıynsha qujattar paketi qalyptastyrylýda.
