Boks • 26 Qarasha, 2020

Úzdikter shetinen súrinýde

166 ret kórsetildi

Bul kúnderi Shymkentte bokstan dástúrli Qazaqstan chempıonaty ótip jatyr. Jarystyń alǵashqy kúninen bastap sensasııalyq nátıjeler tirkelip, keıbir úzdik boksshylar alǵashqy synnan súrindi. Nazar­laryńyzǵa ishki birinshiliktiń alǵashqy eki kúninde tirkelgen nátıjelerdi usynamyz.

Jarys shymyldyǵyn 49 kılo salmaqtaǵy bylǵary qolǵap sheberleri túrdi. Dál osy salmaqta Qazaqstannyń bes dúrkin jeńimpazy atanyp, túrli halyqaralyq dodalarda atoı salyp júrgen kókshetaýlyq Temirtas Júsipov týrnırdi sátti bastady. Almatylyq Muhamedjan Ábdirasylovpen judyryqtasqan Júsipov qarsylasyna esh múmkindik qaldyrmaı, tóreshilerdiń sheshimimen jeńiske jetti. Sonymen qatar chempıondyqqa basty úmitker sanalǵan elordalyq Ashat Júsipov, jambyldyq Ermek Mádıev, Almaty oblysynyń ókili Jandos Nesipjanov jáne taǵy basqa boksshylar kelesi kezeńge súrinbeı ótti.

52 kılo salmaqta alǵashqy kúnnen-aq úzdik qarsylastar bir-birine tap bolyp, jarys kórigin qyzdyrdy. Atap aıtar bolsaq, 2017 jyly Germanııada ótken álem chempıonatynda 49 kıloda el qorjynyna qola júlde salǵan Túrkistan oblysynyń ókili Erjan Jomart jarys jolynan shyǵyp qaldy. 2017 jyly 52 kıloda el chempıony atanǵan atyraýlyq Oljas Baınııazov 4 raýndta myqtylyq tanytyp, 4:1 esebimen jeńiske jetti. 

Jastar arasynda Azııa chempıony atanyp, mamandardyń kózine túsken shym­kenttik Sabyrhan Mahmut ta eresekter ara­syndaǵy el chempıonatyn sátti bastady. Soltústikqazaqstandyq Danııar Jarasovpen qolǵap túıistirgen ol qarsylasynan ekinshi raýndta tehnıkalyq nokaýtpen basym tústi.

Sondaı-aq 60 kıloda 2017 jyly jastar arasynda Azııa chempıony atanǵan Samatáli Tóltaev, 56 kılodan 60 kıloǵa aýysqan London Olımpıadasynyń qatysýshysy Ilııas Súleımenov, 2013 jylǵy el chempıony Ádilet Qurmetov bapkerler senimin aqtap, kelesi kezeńge joldama aldy. Súleımenov qarsylasyn nokdaýnǵa túsirip, jekpe-jekti merziminen buryn aıaqtaǵanyn aıta keteıik.

Ekinshi jarys kúnin 57 kılo salmaqtaǵy jigitter bastady. Naýryz aıynda Iorda­nııa­daǵy Tokıo Olımpıadasyna joldama berýshi jarysta lısenzııa ıelengen pavlodarlyq Serik Temirjanov alǵashqy «synaqtan» súringen joq. Sondaı-aq osy salmaqta byltyr chempıonatta júldeger atanǵan Orazbek Asylqulov kelesi kezeńge shyqty.

63 kılo salmaqtyń úzdikteri birinshi aınalymnan bosatylǵan. Atap aıtar bolsaq, Zákir Safıýllın, Dilmurat Mıjıtov jáne Bekdáýlet Ibragımov jarysty ekinshi kezeń­nen bastaıdy. Ekinshi aınalymda Safıýl­lın Álı Aqedilovpen, Mıjıtov Azamat Núrkenmen, al Ibragımov Aıtjan Áshirhanmen qolǵap túıistiredi.

Olımpııa oıyndarynda «Qazaqtyń» sal­maǵy atanyp ketken 69 kıloda osy salmaqtyń serkesi – Abylaıhan Júsipovtiń alǵashqy qarsylasy belgili boldy. Ekinshi aınalymda Júsipov birinshi kezeńde túrkistandyq Turar Tileýqabyldan basym túsken Sabyrjan Bekbergenovpen judyryqtasady. 2013 jyly 69 kıloda Qazaqstan chempıony atanyp, keıinnen kásipqoı boksqa bet burǵan jambyldyq Saǵadat Rahmanqul bıylǵy el chempıonatynda baq synap jatyr. Alǵashqy aınalymda ol Temirjan Baımoldany 5:0 esebimen esh qıyndyqsyz jeńdi. Sonymen qatar 64 kıloda el chempıony atanyp, bıyl 69 kıloǵa aýysqan jastar arasyndaǵy Azııa chempıony Sanatáli Tóltaev qarsylasy Qýan Qýatovtan upaı sanymen jeńilip, jarysty erte aıaqtaýǵa májbúr boldy. 2018 jyly Aqtaýda ótken chempıonattyń kúmis júldegeri Aslanbek Shymbergenov jarysty ekinshi kezeńnen bastaıdy. Onyń qarsylasy – shyǵysqazaqstandyq Azamat Ibraımov.

Jarystyń ekinshi kúni aýyr salmaqtaǵy boksshylar da rıngke kóterildi. Ár jyldary ishki chempıonattyń júldegeri atanǵan atyraýlyq Erkin Muhamedjan á degennen-aq jambyldyq Nursultan Amanjolovty jarys jolynan yǵystyrdy. Al Muhamedjan kelesi kezeńde ulttyq quramanyń kapıtany ári Rıo Olımpıadasynyń kúmis júldegeri Qamshybek Qońqabaevpen kim myqtyny anyqtaıdy. Sondaı-aq 2016 jylǵy aýyr salmaqtaǵy el chempıony atanǵan Oljas Buqaev jasóspirimder Olımpıadasynyń kúmis júldegeri Damır Toıbaıdan jeńilip, jarysty erte aıaqtady. Al byltyrǵy Spartakıadanyń jeńimpazy Nurbolat Sermahanov Aıboldy Dáýrenulynan aılasyn asyra almady. Sonymen qatar Spartakıada fınalısi Erjan Seıtimbetov te jarysty erte aıaqtady.

 

Sońǵy jańalyqtar

Qazaqstanda urlyq sany eki esege azaıdy

Qazaqstan • Búgin, 17:15

Kann festıvali jazǵa shegerildi

О́ner • Búgin, 16:42

Prezıdent Alık Shpekbaevty qabyldady

Prezıdent • Búgin, 16:02

Uqsas jańalyqtar