Ishki týrızmdi damytý maqsatynda «Kazakh Tourism» Ulttyq kompanııasy salanyń osy túrin tańdaǵan kásipkerlerge belsendi qoldaý kórsetýde. Naryqty taldaı kele, ondaǵy kókeıtesti máselelerdi aıqyndap,  «Kazakh Tourism» jańa jobaǵa kirisip otyr. Bul – týrbıznes sýbektileri  tájirıbe almasyp, aqparat jáne bilim alatyn vırtýaldy alań - Qazaqstan týrızminiń onlaın akademııasy.

Jobanyń maqsaty – sala mamandarynyń tájirıbesin biriktirip, barlyq steıkholderlerge Qazaqstandaǵy týrızmdi damytýǵa baǵyttalǵan kúndelikti jumystaryna qajet bolatyn ózekti aqparat pen bilim kózine birdeı qol jetkizý múmkindigin berý, ári kez kelgen ýaqytta bilimderin jetildirip, kásibı biliktiligin arttyrýǵa jaǵdaı jasaý.

Onlaın akademııanyń tyńdaýshylary – týrızm salasyndaǵy barlyq bıznes ókilderi: týroperatorlardan bastap, týragentter, ekskýrsııa jetekshileri, aýdarmashylar, etnokeshender, kempıngter, aýylsharýashylyq fermalar, jol jıegindegi qyzmetter ıeleri men otelerler, sondaı-aq salada qyzmet etýge yntaly joǵary oqý oryndary túlekteri. Akademııadaǵy oqý tegin júrgiziledi.

Zaman talabyna saı jańa formatta uıymdastyrylyp otyrǵan onlaın akademııa COVID-19 pandemııasy jaǵdaıyndaǵy adam sanyn shekteý máselesin sheship, tyńdaýshylarǵa kásibı oqýdyń qaýipsiz túrin usynyp otyr.

«Onlaın formatta ishki týrızm akademııasyn qurý – jańa  ýaqyt talaby ǵana emes, týrıstik naryqty kásibı bastamada tolyǵymen biriktirip, áriptesterimizge týrızmniń ardagerleri men bilikti trenerleriniń bilimderi men tájirıbelerin usyný alańy. Bul jobany bastaǵan kezimizde eń aldymen álemdegi jáne eldegi oryn taýyp otyrǵan epıdemıalogııalyq jaǵdaıdy eskerdik. COVID-19 bir jaǵynan halyqaralyq týrızmdi shektese, ekinshi jaǵynan ishki týrızmdi damytýǵa jol ashty. О́ıtkeni qazaqstandyqtar  óz eliniń ásem jerleri jaıly aqparat izdep, ishki týrızmge qyzyǵýshylyq tanyta bastady. Al bul atalmysh sala úshin damýdyń jańa múmkindikterin ashyp otyr. Osy rette biz Onlaın akademııanyń ishki týrızmdi damytýdaǵy jáne de jalpy týrızm bıznesin jańǵyrtýdaǵy keremet múmkindik ekenine senim artamyz», – deıdi «Kazakh Tourism» Ulttyq kompanııasynyń Basqarma tóraǵasy Erjan Erkinbaev. 

Akademııanyń spıkerleri men qonaqtary salalyq memlekettik organdardyń ókilderi, týrızmde aýqymdy tájirıbesi bar jetekshi mamandar, marketologtar jáne de salada tabysty bıznes ıeleri. Mysaly alǵashqy qýrstardyń spıkerleri qatarynda «Sky Way» týroperatorynyń bas dırektory Ásem Qozbaǵarova; Kásipker, quqyqtyq máseleler boıynsha sarapshy Talant Ramazanov; Almaty City Tour jáne ACT Qazaqstan týroperatorynyń dırektory Anton Mıtın jáne taǵy basqalar bar.

«Qazaqstan týrıstik qaýymdastyǵy Qazaqstan týrızminiń onlaın akademııasynyń ashylýyn qýana qoldaıdy. О́ıtkeni qazirgi kúrdeli jaǵdaı talabynda bul – ıntelektýaldy deńgeıdi damytýdyń, bilim alýdyń tamasha múmkindigi. Onlaın akademııa salanyń jańalyqtaryn bilýge, búgingi  kún trendterinen habardar bolýǵa, jańa talapqa saı óz bıznesińdi qalaı damytý kerek ekenin túsinýge, ári biliktilikti shyńdaýǵa kómektesedi. Qazaqstan týrızminiń onlaın akademııasy aıasynda ótkiziletin onlaın semınarlar arqasynda kásipkerler sala boıynsha bilimderin tereńdete túsedi, ári biliktilikterin arttyrady», – deıdi Qazaqstan týrıstik qaýymdastyq (QTA) dırektory, Qazaqstan qonaq úıler jáne meıramhanalar qaýymdastyǵynyń (QQjMQ) prezıdenti Rashıda Sháıkenova.

Bıyl tyńdaýshylar 6 kýrsty oqyp shyǵa alady. Olardyń árqaısysy teorııalyq bilim men tájirıbelik mysaldarǵa toly:

1. «Qarapaıym sózben týrızm jaıly» - Kirispe kýrsy;
2. «О́z salańyzdy tabý jáne tıimdi týrónim usyný»;
3. «Týrıstik ónimderdi satý jáne jarnamalaý»;
4. «Qonaq qabyldaıtyn úıler nemese shaǵyn otel. Tolyq nusqaýlyq»;
5. «Qyzyqty týrónim jasaýdyń 5 ıdeıasy. Úzdik mysaldar»;
6. «Gıd-ekskýrsııa jetekshisi mamandyǵy» - Kirispe kýrsy.

Ár kýrs úı tapsyrmasy bar 5-6 modýlden turady. Oqylǵan materıal boıynsha tyńdaýshylarǵa qosymsha ádebıetter jınaqtalǵan elektrondy kitaphana usynylady.

Akademııa kýrstary týrızm bıznesiniń ókilderine jáne bolashaqta jumys isteýge yntaly jas mamandarǵa kásibı deńgeılerin damytyp, óristerin keńeıtýge, tájirıbe jınastyrýǵa jáne áriptesterimen baılanys ornatýǵa múmkindik beredi.