“Rýhanı jańǵyrý: bolashaqqa baǵdar” baǵdarlamasy sheńberinde uıymdastyrylǵan osy sharaǵa oblys ákimi Ońdasyn Orazalın, esimderi elge tanymal birqatar ǵalymdar qatysty. Qazaq ulttyq óner ýnıversıtetiniń professory, jyraý Almasbek Almatov, “Edige batyrdy ” jyrlaǵan jyraý Qaırolla Imanǵalıevtiń urpaǵy Qaraqalpaqstannan arnaıy kelgen Nýrıdden Qaırollaev, onlaın rejımde Nur-Sultan qalasynan QR Parlamenti Senatynyń depýtaty, zań ǵylymdarynyń doktory, professor Muhtar Qul- Muhammed, Germanııadan shyǵystanýshy, túrki halyqtarynyń qaharmandyq eposyn zertteýshi, professor Karl Raıhl, RF Ý.Alıev atyndaǵy Qarashaı-Sherkes memlekettik ýnıversıtetiniń professory, fılologııa ǵylymdarynyń doktory Nasıphan Sýıýnova, QR Memlekettik syılyǵynyń laýreaty, tarıhshy, dramatýrg, professor Ánes Saraı qatysty. Olar vıdeobaılanys arqyly Edige batyr jaıyndaǵy pikirlerin ortaǵa sala otyryp, ulttyq ónerimizdi jańǵyrtýǵa qosqan úlesi úshin oblys ákimi Ońdasyn Orazalınge alǵys bildirdi.
Jınaq 10 dybystyq jazba dıskisinen turady, 500 danamen shyǵarylǵan. Munda elimizdiń ár óńirinen shyqqan 40-tam astam jyrshy-jyraýdyń oryndaýyndaǵy dybystyq jazbaǵa túsirilgen 50 myń joldan astam jyr toptastyrylǵan. Albomnyń birinshi tomynda «Qyrymnyń qyryq batyry» men «Edige batyr» jyrlarynyń basty qaharmandaryna qatysty tarıhı málimetter berilip, jyrdy osy kúnge deıin jetkizgen jyrshy-jyraýlardyń ómirbaıandary qazaq, orys jáne aǵylshyn tiline aýdarylǵan. Jınaqqa «Edige» men «Qyrymnyń qyryq batyry», «Oraq-Mamaı», «Qarasaı-Qazı» qaharmandyq dastandaryn jyrlaǵan Muryn Seńgirbaıuly, Nurtýǵan, Nurpeıis Baıǵanın nusqalarynan ózge el ishinen ár kezeńde jınaqtalsa da, buryn-sońdy jaryqqa shyqpaǵan jyrlar da engizilgen.
“Edige batyr – tarıhı tulǵa. Osy oraıda orta ǵasyrdaǵy aıbyndy memleketimiz Altyn Ordanyń 750 jyldyǵyna tuspa-tus kelip otyrǵan búgingi sharanyń da orny erekshe”,-dep atap ótti Ońdasyn Orazalın. О́ńir basshysy aldaǵy ýaqytta da Edige batyr men onyń urpaqtaryna qatysty qolǵa alǵan tyń jobalar men zertteýler júıeli túrde iske asyrylatynyn jetkizdi. Sonyń ishinde tarıhı-etnografııalyq ekspedısııalar uıymdastyrý, «Edige» jyryn jatqa aıtýdan mektep oqýshylarynyń arasynda saıystar ótkizý, óńirde kásibı jyraýlyq mektep qalyptastyrý joldary, ónertanýshylar daıyndaý týraly usynystar maquldandy.
