«Biz óz jumysymyzda árqashan «estıtin memleket» prınsıpin ustanamyz jáne azamattyq qoǵammen dıalogqa ashyqpyz. Sebebi - qorshaǵan ortany qorǵaý bárimizdi biriktiretin ortaq is. Úkimettik emes uıymdar da ekologııalyq saıasat pen óńirlerdegi ótkir problemalarǵa qatysty pozısııalaryn bildirip, siz ben bizdiń aramyzdaǵy ózara qatynasty kúsheıtý boıynsha usynystaryn bere alady»,- dep jazdy ol Twitter paraqshasynda.
Onyń sózinshe, osy jyly mınıstrlik qoǵammen birge óńirlerdegi ekologııalyq problemalardy sheshýge baǵyttalǵan Jol kartasy aıasyndaǵy is-sharalardy, ulttyq parkterde ekotýrızmdi damytý joldaryn, taǵy da basqa máselelerdi ortaǵa salǵan.
Onlaın-Forýmǵa 100-ge jýyq adam qatysty. Qonaqtardyń arasynda Qazaqstannyń Azamattyq Alıansy tóraǵasy Baný Nurǵazına, «Qazaqstannyń ekologııalyq uıymdary Qaýymdastyǵy» ZTB basqarma tóraǵasynyń orynbasary Eldos Abaqanov, «GreenWormen» saraptamalyq agenttigi jetekshisi Lıdııa Astanına, «Bizdiń Jaıyq –Nash Ýral» ekologııalyq-týrıstik qozǵalysy» qoǵamdyq birlestiginiń tóraǵasy Elena Tarasenko, «Ekokelisim» halyqtyń densaýlyǵyn saqtaýǵa áreket etý jáne ekologııa Shyǵys Qazaqstan oblysynyń Qaýymdastyǵy» ZTB tóraǵasy Tatıana Chernyshova jáne basqa da ekologııa salasynyń sarapshylary men ekobelsendiler bar.
Forým aıasynda eldegi mańyzdy ekologııalyq problemalar talqylandy. Maǵzum Myrzaǵalıev mınıstrliktiń qorshaǵan ortany qorǵaý salasyndaǵy qyzmetiniń negizgi baǵyttary men nátıjeler týraly aıtty. Talqylaýlar qorytyndysynda jeltoqsan aıynda osyndaı taǵy bir kezdesý ótkizý týraly birlesken sheshim qabyldandy.
«Alda áli qoǵammen birlese atqaratyn jumys kóp. Ekologııalyq máseleler kóp qyrly, bári de keshendi túrde qarastyrýdy talap etedi. Sondyqtan biz úshin qoǵam tarapynan keri baılanystyń bolýy asa mańyzdy. Sizderdiń belsendi azamattyq ustanymdaryńyz ben ekologııa problemalaryn sheshý jolyndaǵy kómekterińizge arqa súıeımiz»,- dep túıindedi Maǵzum Myrzaǵalıev.
