Osylaısha aýyl turǵyny 2019 jyly «Eńbek» baǵdarlamasynyń aıasynda 505 myń teńge qaıtarymsyz grant aldy. Qazirgi tańda tizbekti tor shyǵaryp, aýdan turǵyndaryna tıimdi baǵada satýda.
Bul isti jaqynda bastaǵanyna qaramastan Shapaǵat Ábdýalı óziniń kásibin odan ári keńeıitkisi keledi. Sebebi sapaly ári qoljetimdi baǵadaǵy jergilikti ónimge suranys joǵary. Sondyqtan jeke kásipker aýdandyq kásipkerlik, ónerkásip jáne týrızm bólimine «Bıznestiń jol kartasy 2020-2025» baǵdarlamasy arqyly 2 mln teńge qaıtarymsyz grant alý úshin joba usynyp qoıdy.
Bólim basshysy Aqtileý Bóriqulaqovtyń aıtýynsha, «Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan «Eńbek» memlekettik baǵdarlamasy arqyly nesıe alyp, óz kásibin bastaǵan qazalylyqtardyń qatary kóbeıgen. Oǵan basty sebep – kásibin bastap ketý úshin alynǵan qarjyny qaıtarýdyń qajeti joq.
– О́tken jylmen salystyrǵan qaıtarymsyz nesıe alǵan jerlesterimizdiń qatary edáýir kóbeıgen. Máselen, 2019 jyly 240 adam ǵana nesıe alsa, bıylǵy jyldyń 1 qarashasyna deıin 904 turǵyn qaıtarymsyz grantqa qol jetkizdi. Aldaǵy taǵy da 20 adam óz kásibin bastaýǵa múmkindik alady. Bul jerde taǵy bir aıtyp ketetin jaıt, ótken jyly beriletin qarjy kólemi 505 myń teńge bolsa, bıyl 555 myń teńgege kóbeıdi. Bul árıne memleket tarapynan aýyl turǵyndaryna kásibin bastap, odan ári órkendetý úshin berilgen úlken qoldaý, – deıdi aýdandyq kásipkerlik, ónerkásip jáne týrızm bóliminiń basshysy Aqtileý Talaılyuly.
