Otyrysqa qatysýshylar TMD elderiniń pandemııamen kúres boıynsha qabyldap jatqan zańnamalyq sharalardy, sondaı-aq Eýrazııalyq keńistiktegi ekonomıkalyq yntymaqtastyq jáne ony normatıvtik-quqyqtyq qamtamasyz etý máselelerin talqylady.
Otyrys barysynda TMD PAA Keńesiniń Tóraǵasy saılandy.
Máýlen Áshimbaev Qazaqstan Parlamenti delegasııasynyń atynan Táýelsiz Memleketter Dostastyǵy aıasyndaǵy parlamentaralyq yntymaqtastyqty damytýǵa qosqan zor úlesin eskere otyryp Valentına Matvıenkony TMD PAA Keńesiniń Tóraǵasy qyzmetine qaıta saılaýdy usyndy. Qatysýshylar bul usynysqa qoldaý bildirdi.
Máýlen Áshimbaev óz sózinde uıymnyń jumysyn joǵary baǵalady.
«Búginde Parlamentaralyq Assambleıa bizdiń elderimiz arasyndaǵy parlamentaralyq yntymaqtastyqty nyǵaıtýda mańyzdy ról atqarady. Ol halyqaralyq deńgeıdegi syndarly dıalog pen ózara is - qımyldyń qajetti alańyna aınaldy», dep atap ótti Senat Tóraǵasy.
Kún tártibinde sondaı-aq TMD elderiniń memlekettik bılik organdaryna aldaǵy jylǵy saılaýdy baıqaýǵa daıyndyq máseleleri talqylandy.
M.Áshimbaev Qazaqstanda Parlament Májilisi men jergilikti ókildi organdar – máslıhatqa saılaý 2021 jyldyń 10 qańtarynda ótetini týraly qatysýshylardy habardar etti. Ol TMD PAA-daǵy áriptesteriniń ókilderin saılaýǵa baıqaýshy retinde jiberýge shaqyrdy.
Senat Tóraǵasy sońǵy ýaqytta Qazaqstanda Memleket basshysynyń tapsyrmasy boıynsha saıası salada eleýli ózgerister júzege asyp jatqanyn atap ótti.
«Olar, atap aıtqanda, elimizdiń saılanbaly organdarynda túrli áleýmettik toptar ókilderin kóbirek qamtamasyz etýge múmkindik beredi. Máselen, partııalyq tizimderge áıelder men jastarǵa otyz paıyzdyq kvota engizildi. Bul jas urpaq pen áıelderdiń Parlament pen máslıhattar qyzmetine kóbirek qatysýyn qamtamasyz etýge múmkindik beredi», dedi Máýlen Áshimbaev.
Senat Tóraǵasy Qazaqstandaǵy parlamenttik oppozısııanyń jańa ınstıtýty týraly da aıtty.
«Elimiz Prezıdentiniń bastamasy boıynsha parlamenttik oppozısııa ınstıtýty zań júzinde bekitildi. Májiliske ótken oppozısııalyq partııalarǵa komıtetter quramynda basshylyq laýazymdardy atqarý quqyǵyna kepildik berilgen. Onda Májilistegi bir turaqty komıtettiń tóraǵasy men eki komıteti hatshysynyń laýazymdary týraly aıtylyp otyr. Parlamenttik oppozısııaǵa parlamenttik tyńdaýlarǵa bastamashylyq jasaý, balama zań jobalaryn engizý jáne Májilistegi úkimet saǵatynyń kún tártibin ázirleý múmkindigi bekitiledi», dedi M.Áshimbaev.
Sol kúni TMD PAA-nyń 51-shi jalpy otyrysy boldy. Onda qatysýshy elderdiń parlamentshileri TMD-ǵa qatysýshy memleketterdiń Mádenı mura nysandaryn saqtaý týraly konvensııanyń jobasyn, sondaı-aq birqatar úlgi kodekster men zańdardy qarady.
