Birikken Ulttar Uıymynyń Bas Assambleıasy 2013-2022 jyldar aralyǵyn Mádenıetterdi jaqyndastyrýdyń halyqaralyq onjyldyǵy dep jarııalaǵany ámbege aıan. О́mir súrý salty bir-birimen múlde qabyspaıtyn túrli halyqtardy mádenıetter toǵysy arqyly biriktirýdi kózdegen joba ozyq bilim men bilikti adamzat ıgiligine baǵyttaýdy maqsat tutty. Bıyl IýNESKO qoldaýymen halyqaralyq deńgeıde atalyp ótken Ál-Farabı men Abaı mereıtoılary osyǵan dálel. Oıshyldardyń órkenıettiń damýyna qosqan zor úlesin halyqaralyq qaýymdastyq joǵary baǵalap, Abaıdyń kemel oılaryn álemniń kóptegen ǵalymdary adamsha ómir súrýdiń úlgi-ónegesi retinde tanydy.
Osy ıgi bastamalardyń jalǵasy retinde Eýrazııalyq ýnıversıtetter jelisin qurý maqsaty erekshe ózektilikke ıe bolyp otyr. Halyqaralyq Mádenıetterdi jaqyndastyrý ortalyǵynyń dırektory, aıtýly aqyn Oljas Súleımenovtiń ıdeıasynan týyndaǵan bastama jetekshi bilim oshaqtaryn ortaq meje bıigine birlese jetýge jumyldyrmaq.
– Adamzat balasynyń aldynan kún saıyn sheshimi kúrdeli máseleler kóldeneńdep shyǵyp jatyr. Budan muqalmaı ótý úshin rýhanı birlik kerek. Bilim – adamdy shyrqaý bıikke kóteretin uly kúsh. Álem jastary adamı asyl-qasıetterdiń nárin mádenıetter baılanysy arqyly sińiredi. Olardy izgilikke beıildendirý, bir-birin qurmetteýge úıretý úshin ortaq alań kerek. Bizdiń negizge alyp otyrǵan maqsatymyz da osy, – deıdi Oljas Súleımenov.
Oljas Omaruly tilge tıek etkendeı, árbir memlekettiń keleshegi sanalatyn stýdent jastardyń boıyna adamzattyń turaqty damýyna bastaıtyn qaırat quıyp, bilim mádenıetin qalyptastyrýdyń mańyzy zor. Ýnıversıtetterdiń birlese jumys isteýi adamzat órkenıetiniń órleýine úles qosatyn etıkalyq jáne azamattyq kózqarasy joǵary urpaq qalyptastyrady degen sheteldik ǵalymdar da, atalǵan usynysty biraýyzdan maquldady.
Ortalyǵy Almatyda ornalasqan ǵylym men bilimdi damytý ınstıtýty jalpyadamzattyq qundylyqtar men mádenı san alýandyqty nyǵaıtyp, ortaq dıalog ornatýǵa jáne planetarlyq sanany tárbıeleýge jańa serpin bermek. Osyǵan baılanysty onlaın júzdesýge qatysýshylar Eýrazııalyq ýnıversıtetter jelisin adamzattyq deńgeıdegi gýmanıster Ál-Farabı jáne Abaı atymen ataýdy qoldady.
Keleli keńeste QazUÝ rektory Ǵalymqaıyr Mutanov, IýNESKO-nyń «Avısenna» kampýstarynyń vırtýaldy jelisiniń úılestirýshisi Mohamed Tohar Mıloýdı, MMÝ janyndaǵy Azııa jáne Afrıka elderi ınstıtýtynyń dırektory Igor Abýlgazıev, QazUPÝ prorektory Aqtolqyn Turlyhanqyzy, Qurmanǵazy atyndaǵy Qazaq ulttyq konservatorııasynyń rektory Arman Júdebaev, S.Asfendııarov atyndaǵy Qazaq ulttyq medısına ýnıversıtetiniń rektory Talǵat Nurǵojın jáne taǵy basqa otandyq jáne sheteldik joǵary oqý oryndarynyń basshylary sóz sóıledi.
Oljas Súleımenov jetekshilik etetin Almatydaǵy Mádenıetterdi jaqyndastyrý ortalyǵy mýzeı qundylyqtary men tarıhı-mádenı murany anyqtaý, tolyqtyrý, zertteý jáne nasıhattaý jumystarymen aınalysady. Jańa qurylǵan «Ál-Farabı – Abaı» ýnıversıtetter jelisi» bul baǵyttaǵy jumystardy jandandyryp, tól mádenıetimizdi álemge tanytýǵa úles qosady degen senimdemiz.
