«Mýlan» mýltfılminiń alǵashqy remeıki 1998 jyly álemdik prokatqa shyqqan bolatyn. Al qazaq tilindegi kezekti fılm onlaın-kınoteatrlarda jaqyn arada shyǵady dep josparlanyp otyr.
Aıta keteıik, Gollıvýd kınostýdııalarynyń otbasymen kórýge arnalǵan fılmderin memlekettik tilge «Bolashaq» korporatıvtik qory men «Meloman» kompanııasy dýblıajdaıdy. Osy ıgi joba arqyly qazaq tili Disney stýdııasynyń 39-shy tili jáne Sony Pictures stýdııasynyń 7-shi tili bolypty. Sondaı-aq dýblıaj salasynyń 203 mamany biliktilikterin arttyrǵan. Al «Mýlan» kınotýyndysynyń dýblıajyna «BI Group» kompanııasy demeýshilik kórsetti.
«Bir aıdan keıin biz dýblıajdaǵan 35-shi mereıtoılyq fılm kınoteatrlarda shyǵady dep úmittenemiz. Aqparat jáne qoǵamdyq damý mınıstrligi álemge áıgili stýdııalardyń kontentin dýblıajdaý múmkindigin qarastyryp jatqanyna qýandyq. Biz osydan toǵyz jyl buryn, ıaǵnı 2011 jyly Disney kınostýdııasymen yntymaqtastyǵymyzdy bastaǵan edik. Osy jyldar ishinde Disney, Sony Pictures, Marvel, Lucas Films, Bazelevs jáne basqa da stýdııalardyń 35 fılmine dýblıaj jasadyq. Joba Qazaqstan Respýblıkasynyń Tuńǵysh Prezıdenti N.Á.Nazarbaevtyń alǵys hatymen belgilendi. Jobanyń basty qundylyǵy – balalarymyz ózderiniń ana tilinde eń jaqsy sheteldik anımasııalyq fılmderdi tamashalasa eken», dedi «Bolashaq» korporatıvtik qory Qamqorshylar keńesiniń tóraıymy Dınara Shaıjúnisova. «Biz álemniń jetekshi kınokompanııalarymen kópjyldyq yntymaqtastyq tájirıbemizdi memlekettik organdarmen, respýblıkalyq telearnalarmen jáne barlyq nıet bildirýshilermen bólisýge daıynbyz», dedi ol.
