Konferensııaǵa Memlekettik qyzmet isteri agenttigi tóraıymy Anar Jaıylǵanova, Parlament Senaty janyndaǵy Senatorlar Keńesi tóraǵasynyń orynbasary Birǵanym Áıtimova, Prezıdent janyndaǵy Memlekettik basqarý akademııasynyń rektory Erlan Ábilov, memlekettik organ basshylary, qoǵam belsendileri, oqý oryndarynyń ókilderi men agenttiktiń aýmaqtyq departamentteriniń jetekshileri qatysty.
Alǵash sóz alǵan oblys ákimi Mahambet Dosmuhambetov atalǵan konferensııanyń Tuńǵysh Prezıdent kúni qarsańynda uıymdastyrylýynyń mańyzyna toqtaldy.
"Qazirgi zamanǵa saı myqty memlekettik apparat qurý isi Tuńǵysh Prezıdent-Elbasy Nursultan Nazarbaevtyń esimimen baılanysty ekeni daýsyz. Táýelsizdiktiń eleń-alań shaǵynda aldymyzda syn-tegeýrinder turdy. Osyǵan oraı Elbasy jańa jaǵdaılarǵa tótep beretin memlekettik basqarý júıesin qalyptastyrýdy kózdedi. Qazaqstannyń básekege qabilettiligin arttyrýda memlekettik apparattyń kadrlyq áleýeti mańyzdy ról atqaratynyn jaqsy túsindi. Memlekettik apparattyń sapasy kez kelgen eldiń damý prosesinde sheshýshi faktorǵa ıe. Sondyqtan bul eldiń strategııalyq basymdyqtarynyń tıimdi oryndalýyn qamtamasyz etýi turǵysynan erekshe mańyzdy boldy. Ult Kóshbasshysynyń saıası erik-jigeriniń nátıjesinde Qazaqstan postkeńestik elder arasynda osy baǵytta alǵash bolyp júıeli qadamdar jasady", dedi oblys ákimi Mahambet Dosmuhambetov.
Ákim óńirdegi memlekettik qyzmetshilerdi áleýmettik-ekonomıkalyq turǵydan qoldaý baǵytynda atqarylyp jatqan jumystardy atap ótti.
"Jyl basynda jergilikti atqarýshy organdar faktorly-baldyq shkalaǵa negizdelgen eńbekaqy tóleýdiń jańa júıesine kóshti. Pılottyq modeldiń engizilýi jergilikti deńgeıde kadrlardyń aýysýynyń azaıýyna septigin tıgizdi. Máselen, memlekettik qyzmetshilerdiń aýysýy byltyrǵy sáıkes kezeńmen salystyrǵanda 4,6%-dan 2,6%-ǵa deıin azaıǵan. Bul memlekettik apparat turaqtylyǵyn qamtamasyz etýge múmkindik berdi. Sonymen qatar, jalaqy mólsheriniń ósýi memlekettik qyzmetke degen qyzyǵýshylyqty arttyrdy", - dedi oblys ákimi.
Mahambet Dosmuhambetovtiń aıtýynsha, bos laýazymdarǵa jarııalanǵan konkýrstarda bir orynǵa qatysýshylardyń sany 50%-ǵa ósken. Sonyń nátıjesinde memlekettik apparat bilikti kadrlarmen tolyǵýda. Qazir oblys ákimdigindegi memlekettik qyzmetkerlerdiń sapalyq quramy da artty. Memlekettik qyzmetkerler qatary 1 ǵylyym doktory, 2 ǵylym kandıdaty, 3 PhD doktory jáne "Bolashaq" baǵdarlamasynyń 3 túlegimen tolyqty. Al bos laýazymdardyń sany ótken jyldyń osy kezeńimen salystyrǵanda 4,1%-ǵa deıin azaıyp otyr.
Tuńǵysh Prezıdent kúnine oraılastyrylǵan konferensııada tórt ózekti másele talqyǵa tústi. Qatysýshylar jańa myńjyldyqtaǵy memlekettik apparattyń ilgeri damýy, aýyldyq okrýg ákimderiniń mártebesi syndy máseleler aıasynda oı bólisip, pikir almasty.
Endi atalǵan konferensııany Tuńǵysh Prezıdent kúni qarsańynda jyl saıyn ótkizý kózdelip otyr.
