Qarjy naryǵynda qalyptasyp otyrǵan faktorlar týraly aǵynan jarylǵan bas bankır aqsha-nesıe saıasatyn jumsartqysy keletinin, biraq jaǵdaıǵa obektıvti, basqasha aıtqanda shyndyqtyń kózine týra qaraýǵa májbúr bolyp otyrǵanyn aıtty.
2020 jyldyń 10 aıynyń qorytyndysy boıynsha bizde ınflıasııa 7,1 paıyzdan asyp ketti. Erbolat Dosaev túsindirip ótkenindeı, qazirgi 9 paıyzdyq mólsherleme qazirgi jaǵdaıdyń barometri. Ulttyq bank basshysynyń aıtýynsha, aqsha-nesıe saıasatyn jeńildetý múmkindigi eldegi ınflıasııa turaqtalǵan jaǵdaıda paıda bolady. Ulttyq banktiń úkimetpen birge ımportqa táýeldilikti azaıtý jáne ekonomıkany ártaraptandyrý boıynsha qabyldaǵan sharalar kesheni ınflıasııany tómendetý turǵysynan oń áser etedi degen úmit bar.
– Biz ınflıasııa deńgeıin 2021-2022 jyldary 4-6% dálizinde kútemiz. Bul jaǵdaıda biz aqsha-nesıe saıasatyn jeńildetýge múmkindik alamyz. Ulttyq bank budan bas tartpaıdy, – dep atap ótti E.Dosaev.
Osyǵan deıin mamandar eldiń básekege qabiletin valıýtalyq baǵam, paıyzdyq stavka jáne bıýdjet tapshylyǵy sekildi faktorlarmen basqarylatyn makroekonomıkalyq qubylys dep qarastyryp kelgen bolatyn. Sebebi makroekonomıkalyq kórsetkishterdi respýblıkamyzdyń bank júıesinen bólip qaraý múmkin emes. Sondyqtan mamandar Ulttyq bank júıesiniń básekege qabilettiligin kóterý arqyly elimizdiń ekonomıkalyq-áleýmettik damýynyń mańyzdy máselelerin sheshýge bolatynyn biraz jyldan beri aıtyp keledi.
