Sýretti túsirgen Bolat Omarálıev
«Egemenniń» beldi jýrnalısteriniń biri Arman Oktıabrdiń mereıtoılyq suhbaty «Nadejda apaı, 80 deıtin belestiń bıigindesiz. Esenqul inińiz aıtqandaı, tirshilikte adam shirkin qashqanǵa da, qýǵanǵa da ilesip, jaqsyny da, jamandy da kóredi. Qolyńyzǵa dombyra ustaǵan monshaqtaı kúnińizden Alashtyń aıaly alaqanynda kelesiz. Asqan asý, attaǵan beles, júrip ótken jolyńyzǵa osy bıikten kóz tastaǵanda neni kóresiz?» degen saýalymen órilgen eken.
О́negeli óner ıesi: «Aspankóńil qazaqtyń appaq nıetin kórem. Zaý bıikpen astasqan asqar shyńdary bar salqar dalany kórem. Alataýdaı aıbyndy, Alakóldeı aıdyndy halqymdy kórem. Alaqanyna salyp, qushaǵyn ashqan, kóńili taý bulaǵyndaı taza aqedil aǵaıyndy kórem. Qadiri altynnan bıik qaranar aǵalardy, tektilikti tumar etken aıaýly analardy kórem. Mine, osylar meniń ónerim men ómirimdi órge súıredi, basymdy tórge súıredi, jyǵylǵanda janyma jalaý boldy. Atymdy báıgeden keltirip, aqynym dep arqamnan qaqty. Aq tilegin aıaǵan joq. Alla aýzyma sóz salyp, basyma baq qondyrsa, qandaı da bir bıikke jetken bolsam, armany bıik adamdardyń aq-tileginiń sharapaty dep bilem», degen eken.
Endeshe, áleýmettik jeliden osydan 50 jyl buryn túsirilgen jany sulý aqynnyń sırek sýretin taýyp, onyń syryn oqyrmanmen bólisip otyrǵan jaıymyz bar.
– Bul sýretti 1970 jyly túsirippin. О́zimde 50 jyl saqtaǵan ekenmin.
О́mirde qyzǵanshaq emespin, biraq óz fotoónerime kelgende qyzǵanshaqpyn. Aıtysker jáne jazba aqyn Nadejda Andreevna Lýshnıkova qazaqtyń ortasynda, aýylda týyp-ósken, qazaqy tárbıelengen daryndy qyz. Mektepti de, joǵary oqý ornyn da qazaqsha bitirgen. Bul sýretti Nadıa Qyzylorda pedagogıkalyq ýchılıshesinde oqyp júrgende túsirýdiń sáti kelipti.
– Almatydan Áset Beıseýov pen Tumanbaı Moldaǵalıev ekeýi kelip, pedýchılıshede oqyrmandarymen, stýdenttermen kezdesý keshi ótti. Sonda basqa da aqyn qyzdarmen birge óleń oqydy. Internetti qarasam, Nadıa Qazaq pedagogıkalyq ınstıtýtyn 1969 jyly bitiripti. О́zi biraz oqyp ketken pedýchılıshede de muǵalim boldy dep estigenmin. Al sýretti 1970 jyly túsirdim. Sonda Nadıa 30 jasta eken, – deıdi qyzylordalyq ardager fototilshi Bolat Omarálıev.
«Sol kúni esimde, Tumanbaı jańa óleńderin oqydy. Áset jańa jazylǵan «Altynym» ániniń osy jerde tusaýyn kesip, tuńǵysh ret oryndap jatqanyn aıtty. Kóp nárse este qalmapty, qaıta Tumanbaı men Ásettiń kelgenin umytpaǵan ekenmin», dep eske alady shyǵarmashylyq qorjyny qazynaǵa toly baıyrǵy fototilshi.
ALMATY
