Buǵan deıin "Halyq úni" jobasynyń jumys toby Shyǵys Qazaqstan jáne Aqtóbe oblystarynda bolyp, turǵyndardyń 46 ótinishin qarady. Onyń ishinde 21 kúrdeli másele ortalyq memlekettik jáne quqyq qorǵaý organdarynyń qatysýymen sheshý úshin hattamaǵa engizildi.
Joba QR Prezıdenti janyndaǵy Ulttyq qoǵamdyq senim keńesiniń múshesi, quqyq qorǵaýshy Aıman Omarovanyń bastamasymen júzege asyrylýda jáne Aqparat jáne qoǵamdyq damý mınıstrligi, QR Sybaılas jemqorlyqqa qarsy is-qımyl agenttigi, "Altyn Qyran Foundation" qaıyrymdylyq qory, "Human Rights Lawyers" QQ jobanyń áriptesteri bolyp tabylady.
Batys Qazaqstan oblysynda halyqpen kezdesý Bórli aýdanynan bastaldy, onda jobaǵa qatysýshylar áleýmettik mekemelerge baryp, turǵyndarmen kezdesý ótkizdi. Kórshiles Shyńǵyrlaý aýdanynda QR Sybaılas jemqorlyqqa qarsy is-qımyl agenttiginiń tóraǵasy Alık Shpekbaev, AQDM Azamattyq qoǵam isteri komıteti tóraǵasynyń orynbasary Nurbol Serikbekov jáne joba avtory Aıman Ýmarova azamattardy qabyldady. Turǵyndar avtomobıl joldaryn jóndeý, eldi mekenderdi aýyz sýmen qamtamasyz etý, BQO-nyń shalǵaıdaǵy aýyldaryna mobıldi jáne ınternet-baılanys ornatý, turǵyn úı baǵdarlamalaryna qatysý, áleýmettik nysandar salý jáne t. b. máseleler boıynsha ótinish bildirdi.
Jalpy, jumys tobynyń qaraýyna Batys Qazaqstan oblysynyń turǵyndarynan 25 ótinish kelip tústi. Barlyq suraqtar jumys qaraýyna alyndy.
Prezıdent janyndaǵy ulttyq qoǵamdyq senim keńesiniń múshesi Aıman Omarovanyń aıtýynsha, halyq arasynda kedergisiz kommýnıkasııany qamtamasyz etý jumystary jergilikti atqarýshy organdarmen baılanys ornatýdan bastalady.
"Biz búgin áleýmettik nysandardy aralap, halyqpen kezdesýler ótkizdik. Bizge azamattarmen keri baılanys ornatyp qana qoımaı, memlekettik organdar qyzmetiniń ashyqtyǵyn kórsetip, qoǵamnyń túrli salalaryndaǵy memlekettik saıasatty túsindirý qajet. Máseleler bar jáne olar sheshiledi. Olar qoǵam men memlekettik organdardyń birlesken kúsh-jigerimen sheshiledi. Kóptegen problemalyq máseleler kóterildi. Keıbirine sol jerde jaýaptar berildi, al mazmuny boıynsha kúrdeli máseleler men suraqtar QR Prezıdenti Ákimshiligine jiberiletin bolady", dep málimdedi Aıman Omarova.
Aıta keteıik, búgin "Halyq úni" jobasy Oral turǵyndary men jurtshylyǵyna tanystyrylady.
