№2 kópbeıindi qalalyq balalar aýrýhanasynda sırek kezdesetin aýrýǵa shaldyqqan 7 jasar qyzǵa ota jasaldy. Kishkentaı Tomırıstiń boıynda bir emes, eki patologııa bar. Onyń biri – Proteıa sındromy. Ejelgi grek mıfterindegi syrt beınesin jedel ózgerte alatyn Proteı qudaıdyń atymen atalatyn óte sırek kezdesetin bul aýrýdyń ereksheligi sonda, onda syrqattyń terisi men súıegi shamadan tys ósedi. Al Tomırıstiń eki tabany osyndaı alyptyq beınede óskenine qosa, ishektiń tamyrly buzylýy operasııaǵa ózgeshe kúrdeli sıpat bergen.
«Proteıa sındromy – sırek kezdesetin týabitti aýrý. Bul teriniń, súıekterdiń, bulshyqetterdiń, maı tinderiniń, sondaı-aq qan men lımfa tamyrlarynyń shamadan tys ósýimen sıpattalady. Atalǵan aýrý óte sırek kezdesedi jáne búginde álemde shamamen 200 ǵana osyndaı jaǵdaı tirkelgen. Balanyń aıaǵynyń mólsheri úlken, ol dene salmaǵy men mólsheriniń jartysyn quraıdy, saýsaq aımaǵynda sozylmaly osteomıelıt oshaqtary bar», dedi aýrýhananyń ortopedııa jáne ońaltý bólimshesiniń meńgerýshisi Aǵabek Chınkıbaev.
Dárigerdiń aıtýynsha, aıaq mólsheriniń ulǵaıýıynan basqa, bala ishektiń lımfoangıomatozymen aýyrǵan. Ishekten jıi qan ketý saldarynan Tomırıste aýyr anemııa qosa júrdi. Sondyqtan onyń qanyn qalypqa keltirý úshin aıyna 2-3 ret qan quıý qajet bolatyn.
Bıyl jyl basynda Tomırıs josparly túrde aýrýhananyń ortopedııa jáne ońaltý bólimine jatqyzyldy. №2 balalar aýrýhanasynyń hırýrgteri sáýir aıynda ishekke birinshi operasııa jasady. Bul qaıtalanatyn qan ketýdi toqtatýǵa múmkindik berdi. Osy operasııadan bastap balaǵa jıi qan men onyń komponentterin quıý qajet bolmaı, Tomırıstiń hal-jaǵdaıy jaqsaryp, salmaq qosa bastady.
«Osy aptada quramynda ortopedter, hırýrgter men anestezıologter bar mýltıtártiptik top sol aıaǵynyń tabanyna rekonstrýktıvti otany sátti jasap shyqty. Bul – Tomırıs eminiń 2-kezeńi. Keler jyly aıaqtaryna da, ishekte de operasııalardyń taǵy 3-kezeńin oryndaý josparlanýda. Oń aıaǵyna jasalǵan operasııadan keıin balanyń kúshi men áleýmettik osaldyǵy tómendeıdi», dep túsindirdi A.Chınkıbaev.
Qyzdyń anasy ota jasaýǵa qatysqan barlyq dárigerge úlken alǵysyn bildirip jatyr.
